بیر خردادین ایل دؤنوم مناسبتیله تبریزده ن گزارش

    نئچه گون قاباقدان تبریزده یاییلان مختلف اعلان لار، تراکت لار و سی دی لر وسیله سی ایله تبریز اهالیسی و بوتون آذربایجانلیلار بیر خردادی عزیزله مه گه دعوت اولونموشدولار. خلق خردادین بیرینده ساعت 4 دن 7 یه کیمی بازار آغزیندا ییغیشماقا چاغریلمیشدی. حکومت ده بو مراسمین قورخوسوندان قاباقجادان جدی تدبیرلر گؤرموش، تبریزه ایرانین مختلف یئرلریند ن - لرستان، فارس، کرمان، اصفهان و تبریزین اطرافیندان - مراغادان، مرند ده ن و ... - ویژه نیرولار گتیریلمیشدی. 20 مینه یاخین بو نیروی ویژه دن علاوه، رژیم یوزلر بسیجی و« قره یاخا» (لباس شخصی) قوه لری شهرین مرکزینده کی مسجدلرده توپلاییب، وقتی گلنده مسجدلردن ائشیگه تؤکوب، خلقی ازمه ک ایچون حاضر ساخلامیشدی.  بو مسجد لرده ن جمعه مچید (مسجد جامع)، شهدا ، بادکوبه ای ، شعبان، کریم خان، سالار و  تربیتین ایچینده کی کیچیک مسجدی آد چکمک اولار. مرکزی شهرداری و تازا دارایی ده ده قوه لر توپلامیشدیلار.

   رژیم تظاهراتی ضعیف لتمک ایچون قاباقجادان خلق ایچینده وحشت یاراتماقا چالیشمیشدی. دییلیردی کی حکومت تظاهراتا چیخانلاری شدتله ازه جکدیر. بوندان علاوه، تبریزین کاسیب محله لریندن تظاهراتا گلن لری آزالتماق ایچون- ناهاردان سونرا تبریزین حاشیه سینه گئده ن شرکت واحدین اوتوبوس لارینی تعطیل یا آزالتمیشدیلار. تظاهراتا چیخانلاری تانیماق و سونرا دوتماق ایچون امیر کبیر بازارینین دامیندا اوچ دوربین و  29 بهمن بازاریندا ( بالا فردوسی  آغزیندا) دا دوربین قویولموشدور. یوزلرله اطلاعات ماموری ایسه جماعتین ایچینه قاریشیب، یئری گلنده تظاهراتچیلارین دوتولماسینا کمک ائتملی ایدیلر.

   یوخاریدا دئیلن لردن علاوه، بیر خرداددان قاباق تبریزده کی «اطلاعات»،اعتراضین آدلیم شخصلرینیین بیر حصه سینی دوتوب حبس و یا تهدید ائتمیشدی. دوتولانلارین چوخو بیر ایکی گون سونرا بوراخیلمیشلار.

     رژیمین بو حرکتلری فارس شوونیسمینه قارشی تظاهرات ائتمک ایسته ین آذربایجانلیلاری قورخودا بیلمه دی. ساعات آلتی دا شهناز خیاوانیندا پست خانا کوچه سینین آغزیندا،  " یاشاسین آذربایجان"  شعاری ایله تظاهرات باشلاندی و بازارا ساری یولا دوشدو. بازاردان - راستا کوچه ده ن پلیس حمله ائدیب اعتراضچیلاری کؤهنه تربیته باسدی . ملی بانکین   بؤرونده ن و آیری یئرلرده ن جماعت ینی ده ن بازار آغزینا چیخیب مولانا پاساژینین قاباغینا یئغیشیب، شهدا میدانینا دوغرو و استانداری نین قاباغینا ساری یولا دوشدولر. ساعات میدانینا طرف دؤنوب ایرلی له مک ایسته ردیلر کی «کره نی خانا» آغزیندا پلیسین ویژه نیرولارینین یکانلاری، قارا یاخالار(لباس شخصی لر)، بسیجی لر، سانی ایکی اوچ مین ده ن آرتیق اولان تظاهراتچیلاری آرایا سالیب وحشی جه سینه دؤیمگه باشیلدیلار. برقی باتوملارلا ، سیلی، ته پیک، یوموروق، آغاج، زنجیر هر نه کی الرینه گلیردی ، اعتراض چیلاری وورماقا اسیرگه میردیلر. چوخلی جاوانی دوتوب آپاردیلار. توتولانلار رحمسیزلیک له تاپداییب. توکنمز نفرت ایله ووروردولار. توتولانلارین اوزلرینه رنگلی اسپری ووروب فرماندارینین و بانک ملی نین حیطینه آپاریب اوردان اطلاعاتا منتقل ائدیردیلر. ساعات یئددی ده هامینی داغیدیب. اعتراضه سون قویدولار. آمما اعتراض لار دانشیقلاردا نئچه ساعات تظاهراتدان سونرادا دوام ائدیردی. شایعه واردی کی تظاهراتی سرکوب ائده ن شخصی نیرولارین هر بیریسینه اللی مین تومن پول وبیر داناال تلفونون صفر سیم کارتین وئریب لر. سرکوبا جسارتله اعتراض ائدن  بیر شجاع اورتا یاشلی قادینی  بانک ملی نین قاباغیندا شدتله دؤیوب سونرادا توتدولار.

   بو ایل کی حرکتین مثبت نکته لریند ن بیری انحرافی شعارلارین چوخ آز اولماسی ایدی.