مدرسه لرین آچیلیشی گونو مناسبتینه

   آنا دیلینده تحصیل حقی، انسانلارین طبیعی و دانیلماز حقوقوندان بیری دیر. اونودولموش دیللرین ساخلانماسینا چالیشیلان  بیر دونیاده، 80 ایلدن آرتیق دیر کی وطنیمیزده انسانلارین بو طبیعی حقی ایاقلار آلتینا سالینمیشدیر.

    غیر فارس دیللرین ازیلیب- محو ائدیلمه سی، فقط دیللرین آرادان آپاریلماسی یوخ، میلیونلار انسانین استعداد و معنوی کیفیتلری نین ازیلیب محو اولونماسی دئمه ک دیر.  80 ایلدن آرتیق ایراندا حکم سوره ن فارس افراطی ناسیونالیسمی- فارس شوونیسمی-  بوتون بو حقیقتلری بیلدیگی حالدا، بو سیاستی اجرا ائتمیش و بو بؤیوک ضد بشری جنایته ال وورموشدور.

  بش – آلتی یاشلی خیرداجا اوشاغا آنا دیلیندن باشقا هر بیر دیل- تکرار ائدیریک- هر بیر دیل، یاد بیر دیلدیر، بیگانه بیر دیلدیر و بؤیوک دموکرات س. ج. پیشه وری دئمیشکن بیر  تازا دیل آچمیش اوشاغا – اؤز یوردوندا- بیر یاد دیلی تحمیل ائتمک جنایتدن باشقا بیر شئی دگیلدیر. 

   بو گونکی فارس دیلی معاصر دونیا مدنیتینه گؤزونو آذربایجان دیلی واسطه سیله آچمیشدیر. مدرن تحصیل سیستمی نی ده ایرانا گتیره ن آذربایجان معارفپرورلری اولموشلار. بیرینجی مدرن درسلیک - «وطن دیلی» آذربایجاندا دوغولموشدور. بونونلا بئله ایراندا عمومی تحصیل سیستمی یارانان گوندن آذربایجانین معنوی ثروتلری و  جمله دن آنا دیلیمیز ازیلیب تاپدالانمیشدیر.     

    بو سیاستلره سون قویولمالیدیر. بوتون ایران اهالیسی نین ملی حقوق  برابرلیگیندن، آنا دیلینده تحصیل آلما حقیندن دفاع ائتمک بوتون دموکراتلارین وظیفه سیدیر. ایراندا ملی حقوقدان، آنا دیلیندن محروم ائدیلن غیر فارس ملتلر بو حقوقدان مدافعه ائتمه ینلری حقیقی دموکرات و انسان سئور حساب ائتمیر.

  مدرسه لرین آچیلیشی گونو ، آنا دیلینده تحصیل آلماق حقی اوغروندا مبارزه نین سیمبولیک گونودور. بو مبارزه یه قاتیلیریق و بوتون هموطنلریمیزی بو طبیعی حق اوغروندا مدنی مبارزه چاغیریریق.

   بیز آذربایجان دموکراتلاری مختلف تاکتیک لر و یوللارلا بو گونو ممکن قدر گنیش دایره لرین اعتراض گونونه چئویرمه لی ییک. «آنا دیلینده مدرسه» شعاری ملی شعارلاردان بیرینه چئویریلمه لی دیر.

یاشاسین آنا دیلیمیز!

محو اولسون میلیونلار انسانین دیلینی  و ملی وارلیقین محو ائتمکه چالیشان حاکم شوونیسم!

آذربایجان سایتی  30 شهریور 86