احد واحدی

 1مای دنیا ایشچی لرینین همرای لیک گونونه عشق اولسون!

 انسانا لایق دنیا یاراتماق، قرینه لردیر بوتون انسانلارین ان مهم طلبلرینه چئوریلمیشدیر!

بیر دنیا کی، بیر کیچیک اقلیت، زحمت سیز الده ائتدیکلری ثروتلرین گوجونه، انسانلارین چوخونلوغونا حاکم اولوب و اونلارین مقدراتینی تعیین ائتمه سین!

بیر دنیا کی، بارماقلارجا سایی آز اما دنیالارجا ثروته مالک اولان نئچه امپریالیستی زنگین اؤلکه (آمریکا، انگلیس، فرانسه، آلمان و...)  بوتون دنیادا یئرله شن رنگارنگ اؤلکه لره قنیم بیچیلیب و اونلارین فلاکتی باهاسینا، هرآن استعمار و استثمار یولاریلا، حدودسیز ثروتلرینه یئنی دن آرتیرماسینلار!

بیر دنیا کی، محاربه نین منحوس بایقوشو بمبلارین پارتلاییش سسیله بیرلیگده اولاماسین، اما عوضینده، آغ گؤورچینلر، آغ قانادلارین آچاندا، مینلر آغیز صلح ماهنی سین ترنم ائله سین!

بیر دنیا کی، اوندا قادینلار، کیشی لرله حقلری برابر اولوب و بیرلیکده یاشایشین کیچیکلی ـ بؤیوکلو مسئله لرین حل ائده رک، یاشایشدان حقیقی معنادا لذت آپارسینلار!

بیر دنیا کی، اوشاقلار و گنجلر، بؤیوکلرین پروبلماتیک دنیاسیندان اوزاق، اؤز اوشاقلیق و گنجلیک دنیالارینی یاشاسینلار و صاباحین یولچوسو کیمی، صاباحا لایق و گله جگه اویغون اؤزلرینی حاضرلاسینلار!

بیر دنیا کی، فرقلی مدنیتلر و کولتورلر بیری ـ بیرینه تام احترام و سایغی ایله یاناشسینلار!

بیر دنیا کی، انسانلیق نامینه، هامینین اورتاق چالیشماسی و اشتراکیلا، دوستجا ـ قارداشجا یاشاماغا امکان یارانسین!

بونلار و بونلارا بنزر چوخلی ایستکلر، انسانلار اوچون بیر رؤیا دگیل بلکه واقعیتدن آسیلی اولان و بئله بیر گله جکه دوغرو مبارزه ده، انسانی بیرلیگه چاغیران و ائدیال گوجونه مالک اولان بیر یوکسک فعالیتدیر.

100 ایلدن آرتیقدیر 1 مای اوره گینده بئله بیر گله جگین چرده گینی داشییر! 100 ایلدن آرتیقدیر کی، 1 مای زحمتکش انسانین بین الملل مبارزه سینین گونودور! 100 ایلدن آرتیقدیر کی، 1 مایین آدی گلنده، ایش دنیاسینین سرمایه علیهینه مبارزه سینین بین الخلق سجیه سی و همرای لیک گونو دوشونولور. ائله بونون اوچون 1 مای کلمه سی، اورتاق مجادله ده، زحمت دنیاسینین مبارزه رمزینه چئوریلیبدیر.

بوگون آذربایجاندا و هابئله ایرانین بوتون شهرلرینده، ایشچی لر و بوتون زحمت آداملاری آغیر بیر شرایطده مای بایرامینی قارشیلاییرلار:

آمریکا سلاح و نفت کونسرن لرینین جنگ ایچون ایسته دیکلری هر بیر شرایطی اسلامی رژیم حاضرلاماقدادیر. عقلسیزلیکده و معناسیز دانیشیقلاردا، جورج بوش ایله، احمدی نژاد بیری بیرینین مکملی دیر. آمریکانین بیزیم منطقه ده انرژی (یا اصلینده گله جگین هژمونی وسیله سی) مجادله سی بیر طرفدن و  رژیمین بو ش بئیینلیگی او بیری طرفدن ایرانی بیر فجیع و معناسیز محاربه نین آستاناسیندا قرار وئریبدیر.   

نفت دن عاید اولان گلیر 85 نجی ایلده 50 میلیارد دلاردان آرتیق اولدوغو حالدا، فهله لرین آیلیغی 180 مین تومندن (190 دلارایله برابر) آرتمادی! هله بو رسماً چالیشان آداملارا شامل دیر، حال بوکی میلیونلار وطنداشیمیزا، ایش تاپماق هله بیر رؤیا اولموشدور. بوندان بئله، هله 10 مینلر فهله واردیر کی چالیشدیغی حالدا، ایشله دیگی موسسه، آیلاردیر بعضاً ایللردیر کی، اونلارین آیلیغلارینی وئرمه ییبلر. فهله لر ایشسیز اولدوغو حالدا، اجتماعی تامین و ایشسیزلیک حقلریندن محرومدیرلار. 

نفتین بو قدر گلیرینه رغماً، زحمت آدامی بیزیم اؤلکه ده، بعضاً گونده، ایکی و حتی اوچ ایشده چالیشاراق، هله "الی خمیر، قارنی آج" دیر! او اؤز گونده لیگینده هله "کاسیب لیغلا ال به یاخا" و "اهل عیال شرمنده سی" دیر!

بیزیم بحران توتموش اؤلکه میزده، آیلیقلارین آشاغی اولدوغلاری وضعیت، باهالیغین گونوگوندن یوکسلمه سیله هیچ اویغون دگیل و ایشچی لرین هیچ بیر اورقانی یوخدور کی، بو اویغونلوغا (یعنی آیلیقلارین تورم قدر آرتماسینا) دوغرو چالیشسین!

بونلاردان باشقا، فهله و ایشچی حرکاتینین فعاللاری، رژیمین امنیتی اورقانلاری طرفیندن هر زمان هده ـ قورخو یا معروض قالاراق، بئله بیر امنیتی آتمسفرده فعالیت ائله مگه مجبور اولورلار. رژیم هرجوره سی، اونلارین جدی شکلده فعالیتلرینه انگل توره لدیر.

بئله بیر شرایط ده نه ائتمه لی؟؟

بیرینجی چاره یولو تشکیلات لانماقدیر. سندیکا ان اویغون تشکیلات فورمودور. بوگون اؤلکه میزده "سندیکا یاراتما، ایشچی لرین آیدین حقی دیر" شعاری، زحمتکش لرین ایسته گینی تشکیل ائدیر! اصلینده سندیکا، ایشچی لرین صنفی ـ طبقاتی اورقانی دیر. بو اورقان، آزاد، مستقل و دموکراتیک شکیل ده، ایشچی لرین طرفیندن سئچیلیب و اونلارین ایش و یاشایش دورومونو یاخشی لاشدیرماق هدفی ایله فعالیت گؤسته ریر. تشکیلات لانمادان باشقا، آیلیق لارین آرتماسی، ایش محیط ینده و ایشسیزلیک اؤنونده امنیت و ایش مقاوله نامه لرینین ثابت له شمه سی، هرزمانکی کیمین بیزیم شاغل ایشچی لرین جدی ایسته ک لرینی تشکیل ائدیرلر. سرمایه نین آرتیق منفعت طلب لیک حسی، ایشچی صنفی نین اؤنونده یالنیز و یالنیز مبارزه یولونو قویموشدور. ایشچی لرین  گوجو، اؤز ایچینده کی همرای لیکدن علاوه، تشکیلاتلانما و باشقا اجتماعی نهضت لریله جدی قارشیلیقلی علاقه دن عبارتدیر. بو ساحه ده، چئشیدلی نهضتلر او جمله دن: قادینلار، گنجلر، ملیتلر اوچون دمکراتیک هدف لره دوغرو مبارزه آپاران اجتماعی حرکتلر، زحمتکش صنفینین ان یاخین امکداشلاریدیرلار. آذربایجان ایشچی صنفینین فعاللارینا گرکدیر، آذربایجاندا ملی مسئله نین نه اولدوغونوجدی شکیلده آنالیز ائدیب و اوندا اولان پتانسیل دن یارارلانسینلار. 85 نجی ایل آیدینجاسینا گؤستردی کی، بو نهضت، بؤیوک پتانسیله مالکدیر. بو یولدا ایش بیرلیگی، ایشچی صنفینین جدی وضیفه لریندن بیرینی تشکیل ائدیر.

بیز بو بؤیوک شنلیگی، بوتون ایشچی و زحمت کش صنفینه تبریک ائدیب و اونلارین عدالت سیزلیکه و سرمایه نین استثمارینا قارشی و اجتماعی عدالت، رفاه و دمکراسی یا دوغرو مبارزه لرینه عشق اولسون دئییب و اللرینی یولدلشجاسینا برک ـ برک سیخیریق. یاشاسین زحمت دنیاسینین بین الخلق همرای لیک گونو!