بازگشت به صفحه بیشین

اهردن آجی بیر خبر

اهر شهریندن آلدیغیمیز بیر خبر اساسیندا، آذربایجانین تانینمیش و قدیم سیاسی مبارزلریندن اولان "رضا نباتی" (رضا دایی) 86 یاشیندا وفات ائتمیشدیر. رضا دایی عؤمرونون ان گنج چاغلایندان ظلم و استثمار علیهینه ووروشوب، بیر چوخ ایللری شاه و اسلامی رژیم دؤرونده تعقیب و سورگونه معروض قالمیش  و زندانا دوشموشدور.

 باشیندا آزادلیق سئوداسی دولاندیران رضا نباتی 17-18 یاشلاریندان دؤرون سیاسی تشکیلاتلاریندان اولان "صلح تشکیلاتی"نین "حق آلینمالیدیر، وئریلمه‌لی دئییل" ، "مظلوملارین حاقلی ایستک و مطالبه‌لری یالنیز خلق کوتله‌لری‌نین قدرتلی اللری‌له آلینمالی‌دیر" شعارلارینین حیاتا کئچیریلمه‌سینده جدی فعالیت گؤستریر و بو تشکیلاتین مالی شعبه مسئولو وظیفه‌سینده، ایلک دفعه اولاراق 20نجی ایلین مای آییندا،  اهر شهریندن دونیا ایشچی‌لری بایرامی مراسیمینی رهبرلیک ائدیر. او سونرالار حزب توده ایرانین و آذربایجان دمکرات فرقه‌سی‌نین فعال عضوو کیمی عؤمرونون بوتونونو زحمتکشلرین آمالی و صنفی آزادلیغی برپاسی اوچون چالیشیر. انقلابدان سونرا اهر شهرینده سیاسی فعالیتلری اوچون توتولور و بیر مدت تبریز زندانیندا قالیر.

رضا دایی‌نین شرفلی خاطره‌سی هئچ بیر زمان اهر، هریس، خونه‌میر، بخشایش و مهربان ناحیه‌لری‌نین زحمتکشلری و کند کوتله‌لرینین یادیندان چیخمایاجاق. خلق اؤز مبارز اوغول‌لارینین خاطره‌سینی همیشه عزیزلیه‌جکدیر.

"آذربایجان سایتی" امکداشلاری و یازیچیلار هئیتی آذربایجان خلقی‌‌نین بو دؤنمز، وفالی و صداقتلی دؤیوشچوسونون شرفلی خاطره‌سینی عزیزله‌یرک، اونون ایتگیسینی بوتون ایران خلقلرینه، ائله‌جه‌ده رضا دایی‌نین محترم عائله‌سینه و مبارز یولداشلارینا باش ساغلیغی وئریر.

"آذربایجان سایتی" یاخین گلجکده بو مبارز انسانین حیات و سیاسی- اجتماعی مبارزه‌سی باره‌ده اؤز اوخوجولارینا گئنیش معلومات وئره‌جکدیر.