ایلک دفعه "آذربایجان" دا
www.azer-online.com
آجی خبر
گؤرکملی آذربایجان شخصیتی استاد بهزاد بهزادی سون منزیله کؤچدو
ازلــــــدن بئلهدیر چونکـــــــی کاینات
جهــــــان دائمـــیدیر، عؤمور امانات
الدن اله کئچـــــیر وفاسیـــــــز حیات
بیز گلدی- گئدهریک، سن یاشا دونیا!
آلدیغیمیز خبره گؤره، گؤرکملی آذربایجان شخصیتی و ادبیاتیمیزین فخری، تانینمیش یازیچی و فیلولوگ، شرفلی بیر انسان عؤمرونو خالقین آزادلیغی و سعادتی اوغروندا حصر ائدهن مبارز انسان استاد دکتر بهزاد بهزادی وطندن اوزاقلاردا سون منزیله کؤچدو.
استاد بهزاد بهزادی 1306نجی گونش ایلینده آستارا شهرینده بیر مدنی و ضیالی عائلهده دونیایا گؤز آچیر. آتاسی میرزا پاشا چوخ خیرخواه و انسانسئور بیر شخصیت اولاراق شهرین آوادانلیغیندا و همشهرلرینین گؤندهلیک موشگوللرینی حل ائتمکده ان چالیشقان آداملاردان اولوب، عائله عضولرینی مدنی و تمیز ایدهآللار اوغروندا چالیشان انسانلار کیمی تربیه ائتمیشدیر.
بهزاد بهزادی بئله مدنی بیر عائلهده بویا- باشا چاتیر، ایلک و اورتا تحصیلینی اؤز شهرینده قورتاریب، 1322نجی ایلده تحصیلینی دوام وئرمک اوچون تهرانا گلیر، بورادا "دانشسرای مقدماتی"ده ایکی ایل اوخویور.
1324نجی ایلده آذربایجاندا باش وئرهن ملی- دموکراتیک نهضت بهزاد بهزادینیده مینلر گنج کیمی اؤز آلولو اوجاغی اطرافینا چاغیریر. ملی حکومتین سایهسینده ایلک دفعه اولاراق آذربایجان دانشگاهی قورولور و گنج بهزاد اورادا تحصیل آلماق اوچون تهرانلا وداعلاشیب، آذربایجانین اورهیی اولان تبریز شهرینه کؤچور. ملی حکومت دانشگاهیندا "ریاضی" رشتهسینده تحصیل آلاراق "آذربایجان اؤیرنجیلری اتفاقینین صدری" سئچیلیر و بو تشکیلاتین ملی نهضتین آماللاری اوغروندا فعالیت گؤسترمهسینده باجاریقلی گنج رهبر کیمی چیخیش ائدیر.
آذربایجان خالقینین ملی نهضتی آمریکانین حمایهسی آلتیندا مرکزدن گوندریلمیش شاه قوشونونون غدارجاسینا هجومو نتیجهسینده قانا چکیلیر، ایگیرمی بئش میندن آرتیق انسان حیاتینی الدن وئریر، اونلار مین نفر دیدرگین دوشور. گنج بهزاد بهزادیده تعقیبه معروض قالیر، گیزلی صورتده تبریزدن چیخیر و ایکی ایل مدتینده تهراندا گیزلی یاشاماغا مجبور اولور. بو ایکی ایل بویونجا بهزادی یئنهده اجتماعی سیاسی فعالیتلرینه دوام وئریر. 1326نجی ایلدن 1328نجی ایلهدک سمنان، تهران و نوشهر شهرلرینده معلمچیلیک ائدیر. نهایت ایرانین شمال حصهسینده توتوقلانیر و بیر مدت حبسده قالاندان سونرا، ایشدن آزاد ائدیلیر. بو ایل "کالنین" اثری اولان "سیمای معنوی ملتها" کتابینی فارس دیلینه ترجمه ائدیر.
بهزاد بهزادی مدنی- سیاسی فعالیتینه مختلف مقالهلر یازماقلا و ترجمهلرله 1330نجی ایلهدک دوام ائدیر. بو ایلده ایران مقیاسیندا جریاندا اولان نفت صنعتینین ملیلشمه مبارزهسینه قوشولور و بیر سیرا آذربایجانلی دوستلاریلا برابر "بشریت" و "بشیر آینده" روزنامهلرینی نشر ائتدیریر و باش یازار عنوانیندا اؤز ملی- وطنی و مبارزه روحلو مقالهلریله چیخیش ائدیر. 1331نجی ایل آذربایجان یازیچیسی میرزه ابراهیموفون گونئی آذربایجانبن ملی- دموکراتیک حرکاتی کتابینی فارس دیلینه چئویریر.
بهزاد بهزادینین مطبوعاتی فعالیتی 1330نجی ایلین 21 آذر گونوندن گیزلی صورتده نشره باشلایان "آذربایجان" روزنامهسینین باش یازارلیقیلا دوام ائدیر. آذربایجان دموکرات فرقهسینین داخلدهکی اورگانی کیمی اؤزونو تمثیل ائدن "آذربایجان" روزنامهسی، بهزاد بهزادینین باشچیلیقیلا 142 نومرهیهدک نشر اولونور و 1333نجی ایلده پلیس طرفیندن دایاندیریلیر. بهزاد بهزادی 1334نجی ایلده حبسه آلینیر و 1336نجی ایلهدک زنداندا مختلف ایشکنجهلره معروض قالیر.
بهزاد بهزادی حبسدن آزاد اولدوقدان سونرادا حؤرمتلی بیر آذربایجان شخصیتی اولاراق مختلف وظیفهلرده بؤیوک مسئولیت داشیییر. "بیمه ملی ایران" شرکتینین مدیرلریندن اولور، و " بیمه ایران" شرکتینین تملینی قویور و اوزون ایللر "انبارهای عمومی ایران" شرکتینین عامل مدیری کیمی ایشلهییر و 1340نجی ایل "گفتگو در باره بیمه عمر" کتابینی تالیف و نشر ائتدیریر.
بهزاد بهزادی بو ایشلرله برابر اؤز تحصیلینهده دوام ائدیر و 1344نجی ایل تهران دانشگاهیندان حقوق رشتهسینده علمی درجه آلماغا موفق اولور. بونا باخمایاراق بیر آندا اولسون آذربایجانی و خلقینین مدنی- اجتماعی ایستک و آرزولارینی اونوتماییر. 1350نجی ایلدن آذربایجان دیلینین لغتینی علمی صورتده توپلاماغا باشلاییر و بو ایشی انقلابدان سونرا نشر ائتدیگی اوچ جلدلیک "آذربایجان دیلینین ایضاحلی لغتی" کؤچورولمه کتابیلا دوام وئریر.
انقلابدان سونرا اوستادین تالیف ائتدیگی "آذربایجانجا- فارسجا سؤزلوک"، فارسجا- آذربایجانجا سؤزلوک"، "در باره نگارش زبان آذربایجانی"، "آذربایجانجا دیل قورولوشو" و "آذربایجان دموکرات" کیمی تالیف ائتدیگی کتابلار و ترجمه ائتدیگی "دو نمایشنامه" میرزه ابراهیموفدان و "کتاب ددم قورقود شاهکار ادبی- حماسی ترکان اوغوز" کتابلاری ایشیق اوزو گؤرور.
استاد بهزاد بهزادینین انفلابدان سونراکی ادبی- مدنی فعالیتلرینین ان پارلاق نمونهسینی اوچ آیلیق "آذری" درگیسینین نشرینده شاهد اولوروق. گؤرکملی آذربایجان شاعری "حسن ایلدیریم"ین باش یازارلیقیلا ایندییهدک 18 نومرهده نشر اولونان بو درگینی، آذربایجانین بو گونکو اصیل ادبیات آنتولوژیسی کیمی حساب ائتمک اولار. آذری درگیسینین سون نومرهسینده اوستاد بهزادینین آمریکادان یازدیغی "گؤروش امیدیله" عنوانلی "سون سؤز"ونده اوخویوروق"
"من با تمام علاقه عمیقی که به انتشار مجله آذری دارم؛ بینگرانی یقین دارم که نویسندگان و همکاران فرهیخته و شیفته زبان و ادبیات آذربایجان به سردبیری دوست و همکار شاعر و نویسندهی توانا، آقای حسن ریاضی تمام کارها را در دوران غیبت من ادامه داده و اعتلا خواهند بخشید. براستی که تمام سهم و نقش عمده و اساسی در انتشار شمارههای گذشتهی مجله نیز بر عهدهی ایشان بوده است. برای انتشار مجله پس از من هم مجوز قانونی تدارک دیده خواهد شد و این امر مهم در اولین فرصت ملاقات که پیش آید انجام خواهد گرفت."
استاد بهزادی انقلابدان سونرا "آذری" مجلهسیندن علاوه " ائل دیلی و ادبیاتی اوجاغی" نی بیر سیرا آذربایجان شاعر، یازیچی و ادبی شخصیتلرین اشتراکیلا تشکیل ائدیر و بونونلا یاناشی"ائل دیلی و ادبیاتی" درگیسینین نشرینه باشلاییر. بو درگینین ایندییهدک 23 نومرهسی نشر ائدیلیبدیر.
چوخ تاسفله استاد بهزادی بیر مدت خستهلیکدن سونرا نهایت اسفند آیینین سکگیزینده وطنیندن اوزاق بیر اؤلکهده (آمریکادا) دونیایا گؤز یومور و سون منزیله کوچور.
"آذربایجان سایتی" امکداشلاری بیر داها بو داهی انسان، گؤرکملی آذربایجان ادبی- مدنی شخصیت، مبارز و بشری ایدهآللار صاحبی شخصیتین عزیز خاطرهسی قارشیسیندا باش اییر، و بو نیسگیللی ایتگینی بوتون آذربایجان و ایران خالقلارینا، خصوصیله ادبی- مدنی جمعیتیمیزه باش ساغلیغی وئریر. استاد بهزاد بهزادینین شرفلی خاطرهسینه عشق اولسون.
نهم اسفند 1377
"آذربایجان سایتی" یازیچی لار هئیتی