آذربایجان

 

 
  آنا صحیفه ►►► سیاست اجتماعی ملی تاریخ ادبیات و هنر  
 

G8 ین علیهینه اعتراض نمایشلری

روستوک ـ 03.06.07 ـ آلماندا گلن چارشنبه گونو باشلایان G8 ( 8 کاپیتالیستی اؤلکه نین زیروه اجلاسی) علیهینه، قویولان اعتراض نمایشلرینه، ایندیدن 80 مین نفر معترض ( دولتین آمارینا گؤره 30 مین نفر) قاتیلمیشدی. گلوبالیزاسیون ضدینه اولان بو حرکت، دونن روستوکدا، "باشقا دنیا ممکوندی" شعاریله میدانا گیرمیش و بوگون آغیر بیر قارشیلاشمادان سونرا پلیس، نمایشچی لری، سرکه لی سو و گؤز یاشی گتیرن گازلا استقبال ائتمیش و نمایشچی لرین بیر قروپو پولیسله قارشیلاشاراق، داش و مولوتوف کوکتلی آتیمیش و یان دؤوره ده بعضی اشیانی اودا چکمیشدیر. 430 پولیس و 1000 نفره یاخین معترضلردن یارالانیب وبیر عده توتولموشدور. G8 اجلاسلارینا هر دؤنه بؤیوک اعتراض نمایشی کئچیریلر، اما بو ایل کی تظاهرات هر ایلده کیندن آرتیق تخمین ائدیلیر. 14 مین پلیس و ارتشی قوه بو اعتراضلارا قارشی سفربر اولموش و پلیسین ادعاسینا گؤره، 2000 چوخ رادیکال نمایش چی بو ایل کی اعتراض نمایشینه قاتیلمیشدیر.

ژوئن آیی نین باشلانماسیلا دونیانین 7 کاپیتالیستی زنگین دولتی، روسیه ایله بیرلیکده، هایلیگن دام شهرینده G8 اجلاسیندا اشتراک ائده جکلر. بو اجلاسین باش هدفی هر زمانکی کیمی، گلوبالیزاسیون و یا باشقا سؤزله دنیانین گلن ایللرده نه تهر چاپماسینی پلانلاشدیرماقدان عبارتدیر. بو اجلاسا اعتراض آکسیونو اولاراق، مینلر انسان اوروپانین بؤتون اؤلکه لریندن روستوک شهرینه توپلانمیشدیر.

آلماندا قویولان G8 زیروه سینه قارشی بؤتون دنیادا بؤیوک بیر اعتراض دالغاسی یوکسه لمکده دیر!

هر اجلاسی اعتراضلارلا قارشیلاشان G8 اؤلکه لری نین آلماندا کی، توپلانتی سی باشلامادان اؤلکه نی آیاغا قالدیرمیشدیر. هایلیقن دام شهرینده 8 ـ 6 ژوئن تاریخینده تشکیل تاپان زیروه اجلاسی، تشکیل تاپمادان روستوک شهرینده، توپلانان اون مینلر اعتراض چی ایله شهری، ساواش و شورش وضعیتینه چئویرمیشدیر.

"باشقا دنیا ممکون" شعاریله تشکیل تاپان نمایشین چاغریشینا، چوخلی مشهور شخصیت و بین الخالق اجتماعی ـ سیاسی فعاللار امضاء آتمیشدیر. هارولد پینتر ادبیات نوبلینین قازانانی انگلیس دن، آنتونیو نگری ایتالیالی فیلسوف، سوزان گئورگه گلوبالیزاسیونون منتقدی فرانسه دن و والدن بلو، فلیپین دن بو چاغریشی امضالامیشلار. بوندان علاوه بیر سیرا آلمانیین مشهور شخصیتلری پتر سودان آلمانلی آرتیست، خانم دانیلا دان، آلمانین مشهور یازیچی سی و امیل مانگلس دورف، جاز موسیقی سینین دنیا شهرتلی ایفاچی سی، بو اعتراض آکسیونلارینا دستک وئریبلر. بوبؤیوک اعتراضین قدرتینی اونوتشکیل ائده ن اورقانلار و قروپلارین رنگارنگ اولدوغوندان دویماق اولار: سالم یاشایش محیطی مدافعی، Green peace و صلح شبکه سی کیمی اورقانلار، مدیکو انترناسیونال، فهله صنفینین مدافعی سندیکالار بیرلیگی، گولوبالیزاسیون منتقدلری، آتاک، بشر حقلری مدافعه اورقانلاری، مهاجرلردن مدافعه، گنجلرین سیاسی اورقانلاری، فاشیسمه قارشی و رنگارنگ سول قروپلارینین تشکیلاتلاری، بو  نمایشلری ترتیب وئره ن اورقانلاری تشکیل ائدیرلر.

آوروپانین دؤرت بیر یانیندان روستوکا گلن نمایش چی لر، اجلاس بیته نه قدر شهری ترک ائتمه یه جکلرینی قید ائتمیشلر. آلمان، انگلیس، فرانسه، ایتالیا، روسیه، کانادا، آمریکا و ژاپون تشکیل ائتدیگی G8 زیروه سینه، " G8 ین دنیاسی ساواش دنیاسی" افاده سیله اعتراض ائدیرلیر.

"ساواشا، یوخسوللوغا،اتمی مرکزلره،یئر کوره سینین ایسینمه سینه یوخ!" شعارلاری نمایش چی لرین باشقا ایستکلرینی تشکیل ائدیر.

1990 دان بوگونه قدر، آفریقادا، آسیادا و اورتا دوغو دا ( خاور میانه ده) میلیونلارلا انسانین اؤلدویو ساواش و اشغاللارین مسئولو، باشدا آمریکا اولماقلا G8 اؤلکه لریدیر. 2005 ین رقملرینه گؤره انگلیس ده 200، فرانسه ده 350، روسیه ده 8600، آمریکادا ایسه 10640 عدد اتمی سیلاح واردیر. دنیانی دفعه لرله یوخ ائتمه گه قادر اولان و بؤیوک بیر تخریب گوجونه مالک اولان G8 اؤلکه لری آراسیندا، آمریکا آتوم بومباسینی بوگونه قدر، قانونی و رسمی شکیلده تولید ائده ن یالنیز اؤلکه دیر. 2005 ایلی راپورلارینا گؤره، دنیادا 500 میلیون "لاپ یوخسول" انسان وار. بوتون دنیادا 2،8 میلیارد چالیشان انسانین 1،4 میلیاردینین گلیری، اونلاری و عائله لرینی یوخسوللوق سرحدینین اوزه رینه چیخارمالارینا یئتمه ییر. G8 اؤلکه لری بو اکونومیک دوروموندا مسئولودور.

دنیا اوزره ایش سیزلیک، G8 اؤلکه لرینین انسانلیغا باشقا بیر ارمغانیدیر. 1995 ده دنیادا 150 میلیون ایش سیز وارایکن، 2005 ایلینده دنیا بوتونلوگونده ایش سیزلرین سایی 192 میلیونو آشدی.هر ایل 3،3 میلیوندان آرتیق اوشاق اؤلو دوغولور. 4 میلیوندان آرتیق اوشاق دنیایا گلدیکدن سونرا ایلک 28 گونون ایچینده حیاتینی ایتیریر. 6،6 میلیون کیچیک اوشاق، 5 یاشیندان اؤنجه اؤلور. 2004 ایلینده 3،5 میلیون انسان، 1981 ایلیندن بری 30،9 میلیون انسان ایدز سببی ایله دنیادا ن گئتمیشدیر. خصوصاً یوخسول آفریقا اؤلکه لرینده، G8 اؤلکه لرینین شبکه سی آلتیندا، داوا شرکتلرینین باهالی علاج سیاستلری، میلیونلارلا آفریقالی نین اؤلمه سینه سبب اولموشدور.

بین الملل پول صاندیقی ( (IMFکیمی، دنیا بانکی کیمی، دنیا تجارت تشکیلاتی کیمی کاپیتالیستی اورقانلارینین باشیندا یالنیز G8 اؤلکه لری واردیر. خصوصاً 11 سپتامبر حادثه سیندن سونرا، مهاجر انسانلارا قارشی دشمنچیلیگ آمریکا، انگلیس، فرانسه و ایتالیا کیمی اؤلکه لرده دولت سیاستی اولاراق آرتیریلمیشدی. "مدنیتین سون قلعه سی" اولدوقلارینی ادعا ائده ن اؤلکه لرده، اونلارلا مهاجر انسانین اؤلدورمه سینه سبب همین راسیستی سیاستلر اولموشدی.

نسخه قابل چاپ

 
 

 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.