ایستیرم ترسه گئدنلر دایانا، بوق چالیرام

بلکه بیرگون بو یاتانلار اویانا، بوق چالیرام.

هرت‌ایله پرتی سئچنمیر بو جماعت نه ائدیم؟

ایستیرم اؤز حقوقون یاخشی قانا، بوق چالیرام.

گؤزله‌ییر انسان اولان شخص بشر حق‌لرینی

من اونون اوستونو اؤرتن قابانا بوق چالیرام.

باغلامیش یوللاری، ملت گئده بیلمیر ایره‌لی

دئییرم بلکه چکیلسین اویانا، بوق چالیرام.

فیکر ائدیرسن کی پولوم چوخدور اؤزومده شولوغام

خیاواندا بو مارال تک مامانا بوق چالیرام.

گزیرم "آبرسان" یا کی "ولیعصر"ی بو گون

شهلا، ژیلا کیمی ماملی- ماتانا بوق چالیرام.

اون‌اوچ- اون‌دؤرد یاشی وار، اللی قلمدیر بزه‌یی

من بو اوغلانلارا قاش- گؤز آتانا بوق چالیرام.

پارکلاردا، خیاوانلاردا بو آزاد دولانیب

بئش کیلو تریاکی بیردن ساتانا بوق چالیرام.

اکستازی، هروئین، مورفین، حشیش، ناس، کوکائین

بو جوان نسله وئریب، آلدادانا بوق چالیرام.

یوخ داداش! یاخشی تانی، من بو ائلین شاعری‌یم

من بو غفلت یوخوسوندا یاتانا بوق چالیرام.

قویلانیب بس کی خرافاته، اینانمیر علمه

بو اومیدایله کی بلکه اویانا، بوق چالیرام.

بیز یئره جومماداییق، غرب گزیر افلاکی

بلکه بیزده قوشولاق بیر جهانا، بوق چالیرام.

گؤزله بیردن قویونو قوردا وئررسن "میرزه"

من سنین تک بئله غافل چوبانا بوق چالیرام.

تیر- تیکانلیقدی بو طنزین یولو "آرش"ده گئدیر

ایستیرم تؤوشون آلیب، بیر دایانا، بوق چالیرام.