آذربایجان

 

 
  ►►► سیاست اجتماعی ملی بین الملل تاریخ  
 

 

حسن جداری

شانلی قیام !

ظلم الیندن چون گلیبدور جانه، آذربایجان

ال ووروبدور، شانلی بیر عصیانه ،آذربایجان

بیر نظر قیل تبریزه،سولدوزا یا اورمیهّ یه

گور نئجه غلطان اولوبدور قانه، آذربایجان

توکدی خلقین قانینی بیر ییرتیجی دوشمن،یره

گلمه سین بولمم نیه،افغانه ،آذربایجان؟

ظلم و استبداده قارشی،ائتدی یوز مین لر،قیام

قووزادی باشین گنه، طغیانه،آذربایجان

چوخ شرفلی نامورلر، حق یولوندا ئولدولر

چوخ ایگیت لر، دوشدولرزندانه ،آذربایجان

بو رشادت، بو شهامت، بیله بیر شانلی قیام

زلزله سالدی،بوتون ایرانه ،آذربایجان

غم گونونده تا گله، ائل لر اونون امدادینه

گوز تیکیب هر گوشه یه، هر یانه،آذربایجان

ظلمه قارشی،مین دویوشده،گوستریب اؤز قدرتین

اگمیوب باش، شیخه یا سلطانه،آذربایجان

قهرمان بیر ئولکه دیر،غیرتلی بابک لر دوغوب

آفرین، بابک ده کی ایمانه،آذربایجان

دور ایاغه،باش گؤزوندن سیل، توکولموش قانلاری

چاره یوخدور، جومگیلن طوفانه،آذربایجان

ایستیر آذربایجان اولادی، اؤز ترکی دیلین

اؤزگه بیر دیل، زور گلیر انسانه،آذربایجان

ایلیه تا خلقه، بو محنت لی گونده، باشچیلیق

احتیاجی واردی ستارخانه،آذربایجان

سویلیون او قورخی بیلمز قهرمان حیدرخانا

وقتی دور، چیخسین گینه میدانه،آذربایجان

ثروتی سایسیز حساب سیز، بوللیّ سئللی نعمتی

بس نچون، اولموش بئله ویرانه ،آذربایجان؟

فقر الینده ایشچیسی،زحمتکشی قالمیش اسیر

وار یوخی گئتمیش بوتون تالانه ،آذربایجان

بیر بئله تبعیضه،استثماره، ظلمه ،کیم دؤزر؟

ظلم الیندن، لاپ گلیب دور جانه،آذربایجان

سس وئرین فریادیمه، ای آذری یولداشلاریم

گؤرموسوز غلطان اولوبدور قانه ،آذربایجان؟

خرداد آیی، 1385

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.