|
||||||
       |
||||||
|
|
دونیا سندن کیملر کئچدی... ساهر ادبی- مدنی درنهیی، صابر ادبی انجمنی و آذری مجلهسینین بیانیهسی آذربایجان خلقینین بؤیوک اوغلو، ادبیاتیمیزین داهی آقساققالی استاد بهزاد بهزادی اؤلمزلیگه قووشدو.
یئنهده اورهک آغریسیایله ادبیات و مدنیت آغاجیمیزین آنا بیر قولونون قیریلماسینین شاهدی اولدوق. بو آغیر ایتگی بوتون مدنیت و ادبیات سئورلری اورهکدن سارسیلتدی. استاد بهزاد بهزادی اؤز شرفلی عؤمرونو، اؤلکهمیز ایرانین، آنا یوردوموز آذربایجانین انکشافی و یوکسلیشی اوغروندا صرف ائتدی. بو گؤرکملی شخصیت اجتماعی- سیاسی مبارزهیه ان گنج چاغلاریندان گیریشمیش، "آذربایجان دانشگاهی"نین اؤیرنجیلری اتفاقینین صدری وظیفهسیندن، "آذربایجان" روزنامهسینین باش یازارلیغیندان توتموش "آذری" مجلهسینین نشرینه قدهر، همیشه انسانلارین سعادتی، خالقلار آرا دوستلوق، دونیا اوچون صلح و امین- آمانلیق و عموم بشری ایدهآللارین اوغروندا چالیشقان انسانلارین اؤن سیرالاریندا گئدنلردن اولموشدور. استاد بهزاد بهزادی گؤرکملی اجتماعی شخصیت اولماقلا برابر، عینی حالدا دیرلی عالم و فیلولوق و ژورنالیست کیمی؛ مطبوعات تاریخیمیزده، دیلیمیزین و ادبیاتیمیزین یوکسلیشی و چیچکلنمهسی ساحهسینده، اؤلمز اثرلری، مصاحبه و مقالهلریایله درین ایزلر بوراخمیش و اؤز "لغتلری" و "گرامر کتابی"، ترجمه و مصاحبهلریایله مدنیت خزینهمیزی زنگینلشدیرمیشدیر. استاد بهزاد بهزادی، اونودولماز اجتماعی و ادبی خادم کیمی خلقیمیزین معنوی دونیاسیندا ابدی اولاراق یاشایاجاقدیر. بیز بو بؤیوک ایتگینی بوتون وطنداشلاریمیزا، اوستادین حؤرمتلی عائلهسینه، ایران و آذربایجانین ادبی- مدنی جمعیتلرینه، علم و مدنیت و اینجه صنعت خادملرینه و خالقلارین دوستلوغونا و مدنیتلرینه حؤرمت بسلهین بوتون انسانلارا باش ساغلیغی وئریر، "یولو دواملی اولسون!"- دئییریک.
ساهر ادبی- مدنی درنهیی صابر ادبی انجمنی آذری مجلهسی 9/12/1386
|
|||||
|
"آذربایجان"
دا
یازیلان مطلب لردن
باشفا سایت لار ویایینلاردا
فایدالانماق، |
||||||
