آذربایجان

 

 
  ►►► سیاست اجتماعی ملی بین الملل تاریخ  
 

 

نسخه قابل چاپ

احد واحدیاورهان پاموک

 اورهان پاموک
نوبل ادبیات جایزه سینه لایق گؤروندو

 اورهان پاموک 2006 نجی ایل نوبل ادبیات جایزه سینی قازاندی؛ بو بیر رومانچی اوچون بؤیوک موفقیتدیر!! اورهان پاموک رومانلاریندا، کئچمیش ـ بوگون، دوغو ـ باتی، لائیک لیک ـ اسلام  و... کیمی متضاد موضوعلار و چئشیدلی انسان پورتره لری اوزره پسیخولیک ـ معنوی آراشدیرمالاریلا باشقا یازیچی لاردان فرقله نیر. پاموکون دیلی گوجلو، تخیلی درین و یازی سیستمی یئنی دیر؛ او تورکیه نین بوگونکو پست مدرن یازیچی لاریندان بیری ساییلیر. او یئنی فکر و عین حالدا سیاسی بیر یازیچی اولاراق، فوندامنتالیسمه و ناسیونالیسمه قارشی بیر انساندیر. اونون اثرلرینده مدرنیته ایله سنتین آراسیندا هرزمان مجادله گئدیر

اورهان پاموک 70 ـ 1960 شرایطینده، بویا ـ باشا چاتان و عمله گلن یازیچی لاردان بیریدیر. فعله و ضیالیلارین او ایللرده مقاومت حرکتلری، اونون اجتماعی دونیا گؤروشونون یارانماسیندا اؤز تاثیراتینی بوراخمیشدیر. بیر یاندان نظامی خونتای و باشقا طرفدن بوتون ضیالیلارین و خصوصا" اونیورسیته لرده کسگین دایانیش، اوندا آزادلیق سئورلیگ و دوکراتیک افکارین انکشافینا سبب اولموشدور. 

 تورک ادبیاتی ناظم حکمتدن یاشار کمالا قدر نئچه بؤیوک شاعر و یازیچی دنیا ادبیاتینا ارمغان گتیرمش و هابئله اونلار ایللر قاباقدان دنیانین بواهمیتلی مکافاتینا لایق بیر صنعتکارلاردیرلار. 1982 ده "اینجه ممد" افسانه سینین یازانی یاشار کمال ایله، "یوز ایللیک یالنیزلیق" ین یازیچیسی گابریل گارسیا ماکزین نوبلی الده ائتمک اوچون، بیر سویه ده دایانماسی عینی مثالدیر. جایزه گابریل گارسیا ماکزا یئتیشدی. ایندی یعنی 2006 دا یاشار کمالدان اسیرگه نن بو مکافات اونون شاگردلریندن اولان اورهان پاموکا چاتمیشدیر. تورک توپلومو بوشیرین حادثه نی هر حالدا انتظار چکیردی.

دیگر طرفدن فکر آزادلیغینا قارشی اولان، "ارمنی سوی قیریمینی رد ائدنلره زندان و پول جزاسی" قراری، فرانسه ملی مجلسینین طرفیندن قبول اولدو.

فرانسه ملی مجلسینین ارمنی سوی قیرمی ایله علاقه دار قراری و اورهان پاموکون قازاندیغی نوبل ادبیات جایزه سینین اعلان اولونماسی، ندنسه بیر زامانا راستلاشدی؛ بو ایشده نه درجه عمد واریدی، کیمسه یه معلوم دگیل. هرحالدا بو حادثه یعنی فرانسه مجلسینین قراری، اورهان پاموکون قازاندیغی بو اهمیتلی  جایزه نی تحت الشعاع قرار وئردی و بو دوروم تورک خلقینین سئوینجیندن چوخ کدرینه سبب اولدو؛ حال بوکی، طبیعی دیر کی، اورهان پاموکون کئچن ایل سؤیله دیگی ارمنی سوی قیرمینا دایرسؤزلری، قاباقدان بو ایشه زمینه یاراتمیشدیر. اماهرحالدا سهودیر دئسک کی، نوبل ادبیات جایزه سی اورهان پاموکا گئچن ایل، ارمنی لر و کردلرین سوی قیریمی باره ده سؤیله دیگی سؤزلره خاطر وئریلمیشدیر؛ چونکی اورهان پاموکون آدی نئچه ایلدیر کی، نوبل ادبیاتی مکافاتی وئریلن زمان کاندیدلرین ایچینده گلیر. مثال اولاراق کئچن ایلکی نوبل ادبیات جایزه سینی قازانان انگلیس یازیچی سی "هارولد پینتر"، کئچن ایل اؤزونون نوبل ادبیاتی جایزه سینین خبرین آلدیقدان سونرا، مکافاتین اوزونه نه ایچون وئریلدیگینین دوشونمه دیگینی و نوبلی اورهان پاموکون حقی اولدوغونو سؤیله میشدیر. بو ایل سوئد آکادمیاسی نین آچیقلاماسیندان اول، ان یاخین کاندید اورهان پاموک گورسه نیردی. حتی کئچن ایل بیر سوئد روزنامه سینده ، اورهان پاموکدان، "گله جگین نوبل ادبیات مکافاتینین کاندیدی" آد آپاریلمیشدیر.

باشقا جهتدن، ژوری هیئتی جایزه نی بیر آداما وئرنده، اونون نه اینکی بیر سیاسی چیخیشینی، بلکه عمر بویو انجام وئردیگی عمللرینی و هر زاددان اول، اونون ادبی فعالیتینی و یوکسک یارادیجیلیغینی نظرده توتور.

سوئد ین سلطنتی علم لر آکادمیاسی نین آچیقلاماسیندا،"یاشادیغی شهرین سئودایی و عرفانی روحونون ایزلرینی سوره رکن، کولتورلرین بیر بیرلریله مشاجره سی و هؤرولمه سی ایچون یئنی نشانه لر تاپان"، اورهان پاموکا 2006 نجی ایلین نوبل ادبیاتی جایزه سینین وئریلدیگی افاده سی یئر آلمیشدیر.

ایندی تورک یازیچی سی اورهان پاموک دنیانین ان مهم ادبیات جایزه سینی الده ائدیبدیر؛ هر عنوانین آلتیندا بو جایره نی قازانیبسا، مهم دگیل. بیر زاد کی بللی دیر، بو مکافاتین قازانماسی تورک ادبیاتیندا بؤیوک تاثیرلر بوراخاجاق و هابئله باشقا تورک یازیچی لارینین اثرلرینین دونیا سویه سینده ترجمه سینه یول آچاجاقدیر.

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.