آذربایجان

 

 
  ►►► سیاست اجتماعی ملی بین الملل تاریخ  
 

 

نسخه قابل چاپ

املامیزلا علاقه ده گئچیریلن سمینارا
 مراجعت نامه!

1384- نجی ایلده، تهراندا عرب الفباسی اساسیندا آذربایجان دیلی اورفوگرافیاسی (یازی قایدالاری) نین ایکینجی سمیناری  کئچیریله جکدی. بیرینجی سمینارین قبول ائتدیگی یازی قایدالارینا جدی تنقیدله یاناشان بیر سئرا  خارجده کی هموطنلریمیز بیر مکتوبلا بو سمینارا مراجعت ائتمیشلر. ارفوگرافیا مسئله لری نین هله ده آکتوئل اولدوغو ایچون  بو مکتوبو  اوخوجو لارا تقدیم ائدیریک. مکتوبو برلین شهرینده یاشایان آذربایجان ادبیاتشناسی، امکداشیمیز  م. ع. حسینی حاضیرلامیشدیر.

 آذربایجان

 

1979  ـ نجی ایل ایران انقلابی پهلوی رژیمینه سون قویدوقدا، آنا دیلیمیزله علاقه ده نسبی آزادلیق یارانیر. الده ائدیلن همین معین نائلیتدن تمام ایگیرمی آلتی ایل گئچیر. تام تأسف حسّی ایله قید ائتمه لیک کی بو اوزون مدتین عرضینده، الوئریشلی شرایطدن خلقیمیزین آنا دیلینده سوادلانماغینا دایر نه فقط لایقینجه استفاده ائدیلمه میشدیر، حتّی عکسینه اولاراق بعضی لری طرفیندن بدعت ویا خود اختراع ائدیلمیش چئشیدلی و رنگارنگ املا اصوللاری، بو گونگی یازیلی دیلیمیزده درین هرج ـ مرجلیک عمله گتیرمیشدیر. بو کیمی دولاشیقلیق دیلیمیزین تعلیم و تدریسی اوچون مدهش بیر انگل اولدوغو انکار ائدیلمزدیر!

ملی مدنیتیمزله باغلی بو کیمی آجیناجاقلی شرایط، بیر چوخ آنا دیلیمیزین دریندن قایغی سینا قالان شخصلرین و یازیچی و دیل شناس عالملریمیزین ایلک گونلردن اعتباراً فکرینی مشغول ائتمیشدیر. سون ایکی ـ اوچ ایلده موضوع ایله باغلی دیل شناس عالم حسینقلی سلیمی، شاعر و یازیچی کریم مشروطه چی جنابلارین یازدیقلاری رساله لر دقت مرکزینده دورموشدی. ایللردن بری بو خصوصدا اورگیمیزده اولوب هله کاغذ اوسته گتیره بیلمه دیگیمیز دردیمیز و ایستکلریمیز، اونلارین مدرکجه سینه ایره لی سوردوکلری ملاحظه لرینده اؤز عکسینی تاپمیشدیر.

دیلیمیزین سؤز فونوندا داخل ائدیلمیش، قسماَ فارس سؤزلزیندن باشقا بیر چوخ عرب، و آوورپا منشألی سؤزلر، عینی زماندا فارس دیلی نینده دخیل کلمه لرینی تشکیل ائدیر. فارس دیلی ایله مشترک اولان بو آلینما کلمه لرین املاسینی البته بیرـ نئچه کلمه نی مستثنا ائتمکله، فارس ادبیاتی واسطه سیله اؤرگندیگیمیز املا ایله یازماق، بیر خیلی جهتدن مقصده اویغوندور.

ایستر همین دخیل کلمه لرین، ایسترسه ده آذربایجانجا(تورکجه) سؤزلرین املاسی خصوصدا، دئیلدیگی کیمی، مشروطه چی و سلیمی جنابلارین اطرافلی صورتده منطقی چیخیشلاری قارشسیندا بیزیم بورادا ایضاحیمیزا آرتیق احتیاج دویولمور.یالنیز بیزده اؤز نوبه میزده بونی تأکید ائتمک ایستردیک کی:

اورفوگرافیا دا عنعنعه وی پرنسیبه صادق قالماغیمیز گرکدیر!

عنعنعه وی پرنسیب دئیلدیکده آنجاق 19ـ نجی عصردن اعتباراَ 1945ـ نجی ایله قدر یازیلی ادبی ارثمیزی نظرده توتماق کفایت ائدر. بیز بورادا اؤز اعتمادیمیزی بو ایکی عالمیمیزه بیلدیرمکله، آرزو ائدیریک کی آنا دیلیمیزین تعلیمی اوچون یازیلاجاق درسلیکلر اونلارین سرانجامینا وئریلسین. همچنین آرتیق امینیک کی بوتون قلم صاحبلری اؤز یازیلاریندا مشروطه چی و سلیمی معلمین املامیزا دایر مصلحت و تکلیف لرینی حیاتا گئچیرمکله، دیلیمیزه هئچ جهتدن یارامیان، ساختا و عین حالدا، اولدوقجا ضررلی اولان املالارین استفاده سینه سون قویولسون!

تاج احمدی، اصغر فرانسه
فرهاد مجید زاده آلمان
سیروس مددی آلمان
احد واحدی آلمان
سیامک مقدم آلمان
رشید، شهروز آلمان
سیامک فرّخی (مترجم) آلمان
دکتر احمد مهربانی فرانسه
حسینی، محمدعلی آلمان
اقتصادی، عنایت اه آلمان
محمد آقاپور آلمان
دکترـ مهندس حبیبی ـ جمشید آلمان
غلامحسین شهماری  آلمان
سیف الدین حاتملوئی    آلمان

   23.03.2005   ـ         1384.1.4

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.