آذربایجان

 

 
  ►►► سیاست اجتماعی ملی بین الملل تاریخ  
 

 

احد واحدی

 

باهار گلیر ائلیمیزه!

 

دره دن یاماجا، گئدن ائل چوبانی، باهالی بیر گنجینه تاپمیش کیمی، سئوینجک، یئرینده قیمیلداندی. اؤنجه گؤزلرینه اینانمادی؛ اگیلدی آرتیق دقتله باخاراق، یقین ائتدی:

ـ "اؤزودور، لاپ اؤزودور!".

 گؤردوگو چیچگین ، قار چیچگی اولدوغونا ایناندی! باش قالدیریب گؤیه باخدی. سما آچیق، گونش ایستی! قار چیچگی، هر زمانکی کیمی باهاری ارمغان گتیرمیشدی.  

باهارین نفسی سانکی هریانا داغیلمیشدی. هر شئی اویانماقدا ایدی. یاماجین قار توتدوغو یئرلرینده، بعضاً گؤزه گؤرونمه ین، بعضاً ایسه قارین سئیره ک یئرلرینده گؤزه دیه ن سو آخینتی لارینی دویماق اولوردو. اونلار داشلیقلارا دگره ک شاراقا شاراق، دره نین سکوتونو پوزوب و بیر ـ بیرلریله هارمونیک شکیلده اوره ک آچان نغمه کیمی فضایا داغیلیردی! هریانی قوشلارین، روح اوخشایان، سئویملی و دگیشیگ سسلری بوروموشدو. سانکی باهارین اجرا ائتدیگی کنسرتینین، پایلارینا دوشن بیر قسمینی ده اونلار چالیردیلار! طبیعت قیش پالتارینی چیخاردیب و باهارا لایق پالتارینی گئیمکده ایدی! هریان یام ـ یاشیل، هر یان آل ـ الوان؛ تومورجوقلار آغاجلاردا چیرتداماقدا! بوزلار اریمکده و چمنلر جوجه رمکده ایدی! چیچکلرین، اوت ـ علفین قوخولاری انسانی مست ائله ییردی.

چوبان آیاغا قالخدی؛ سئوینجک یولا دوشدو. آخی او هر ایل کیمی بو مبارک حادثه نی، ائل ـ اوبایا موشتولوق وئرمه لی ایدی. یئتیشن سوروشدو:

ـ "چوبان قارداش نه وار نه یوخ؟"

ـ "تزه خبر!؟"

ـ "سؤیله یئنه نه سببه گئری دوندون؟"

چوبان دینمه دی، چوبان دانیشمادی، یالنیز باخدی، دوداقلاریندا تبسم، دینمه دن ـ دانیشمادان! باخیشلاریندان، دوشوندوگونو اما دیله گتیره بیلمه دیگینی اوخوماق اولاردی:

 

هارای ائللر، هارای ائللر!

قارا قیشی یاخالامیش

یاشیل باهار!

طبیعتده بیر غوغا وار

بیر هلهله؛

باهار گلیر گوله ـ گوله،

گلین وئره ک بیز ال ـ اله!

دولاشاراق شن دیاری

قارشیلایاق ایلک باهاری!

نه یی گؤرسن هارا باخسان!

بیر حرکت، بیر یوکسلیش

دویاجاقسان!

انسان اوغلو، "قیشیندا، یاز"

"قوراغیندا، یاغمور" ـ دئمیش!

اوغورلو گون، غم سیز حیات

آرزولامیش بو یوکسلیش!

گلین ائللر، گلین ائللر!

تلسمه دن دولاشاق بیر

داغی ـ داشی!

سیره چیخاق طبیعتی،

باهاریله بیز یاناشی!

طبیعتده بیر غوغا وار

بیر هلهله؛

باهار گلیر مین شوقیله

بیزیم ائله!

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.