آذربایجان

 

 
  ►►► سیاست اجتماعی ملی بین الملل تاریخ  
 

 

نسخه قابل چاپ

آذربایجان ادبی- مدنی درنک لرینین اشتراکیلا
آذربایجانین مبارز شاعری مظفر درفشی نین 80 ایل لیگی

قید ائدیلدی

 

دی آیی نین 28ینده (18 ژانویه)  آذربایجانین تانینمیش شاعری- مظفر درفشی نین 80 ایللیگی مناسبتی ایله، تهراندا  بؤیوک ییغینجاق کئچیریلمیشدیر. خالقیمیزین مباریز شاعرینه ساغلام حیات، داها ثمره لی و یارادیجی عمر آرزوسی ایله، اجلاس حقینده الیمیزه چاتان معلوماتی حرمتلی اوخوجولارا تقدیم ائدیریک.

آذربایجان

مظفر درفشی - 80 ایللی گینین مراسمی

تهراندا فعالیت گؤسترن آذربایجان ادبی- مدنی درنک‌لری(صابر ادبی انجمنی، آذری مجله‌سی، آذربایجان ایشیق گنجلری، ساهر ادبی- مدنی درنه‌یی) طرفیندن دی آیی‌نین 28ینده، تانینمیش آذربایجان شاعری مظفر درفشی‌نین 60 ایل ادبی- اجتماعی فعالیتیندن تجلیل ائدیلدی.  بؤیوک طنطنه‌ایله کئچیریلن بو مراسمده بیر چوخ آذربایجان شاعر، یازیچی و ضیالیلاری‌لا برابر، آذربایجان دیلینده یاییلان مطبوعات ایشچیلری‌ او جمله‌دن "آذری"، "دیلماج"، "وارلیق"، "خدافرین" و "همشهری ترکی"‌‌‌ده اشتراک ائتمیشدیر. بوندان علاوه، بیر تعداد آذربایجان ادبی- اجتماعی شخصیت‌لر طرفیندن مراسم اوچون پیاملار گؤندریلمیشدیر. مراسمده آذربایجانین تانینمیش یازیچی و تدقیقاتچیسی رحیم رئیس‌نیانین پیامی و هابئله ایراندان کناردا یاشایان بیر تعداد استاد درفشی‌نین یاخین دوستلاری و شاعر اسماعیل جمیلی‌نین پیاملاری اوخوندو. "کانون نویسندگان ایران" عضولریندن و فارس یازیچیلاریندان دکتر فریبرز رئیس‌دانا، علیرضا جباری، محمدعلی عمویی، ابراهیم دارابی و شریف فراهانی مراسیمده اشتراک ائتمیشدیلر. مراسمین مختلف حصه‌لرینده آذربایجان عاشیق و موغام خواننده‌لری‌نین چوخ گؤزل چیخیشلاری اولدو.

مراسم دکتر بهزاد بهزادی‌نین دانیشقیلا باشلاندی و اوندان سونرا آذربایجان دیلینده یازیب یارادان بیر تعداد شاعر، یازیچی و ضیالی‌لار چیخیش ائتدیلر. دکتر جواد هئیت، هاشم ترلان، مجید امین موید، حبیب فرشباف، حسن ایلدیریم،  عزیز محسنی، سؤنمز، علیایی، احمد پوری، مرتضی مجدفر، شکوه آنا، شهرک، ائلدار موغانلی، رحیم کاویان، ائل اوغلو،  گیتا درفشی، سئودا وطن‌سئور، سئل‌اوغلو، سولماز و کریم قربانزاده ، استاد درفشی‌نین حیات و یارادیجیلیغیندان سؤز آچیب، شعرلر اوخودولار و خاطره‌لر سویله‌دیلر. مراسمده اوخونان استاد مظفر درفشی‌نین حیات سالنامه‌سینی آشاغیدا تقدیم ائدیریک:

ديل آچان خاطره‌لر شاعری؛
استاد مظفر درفشي‌نين حيات سالنامه‌سي

مظفر درفشی - 80 ایللی گینین مراسمی، سولماز و کریم (مراسیمین آپاریجی لاریمظفر درفشی‌نین کئچدیگی عمر یوللاری چوخ مشقتلی و عذابلی اولوبدور. آنجاق بو عذابلی ائنیشلی - یوخوشلو حیات یوللارینا مظفر درفشی‌نین گؤزو ایله دؤنوب باخاندا، اوندا شرف و افتخار ایزلرینین شاهدی اولوروق. بو شرف ایزلری‌له‌دیر کی شاعرین یارادیجیلیق آنلامینی و اونون کئچیرتدیگی 80 ایل‌لیک عمر یوللارینی منیمسه‌مک اولار. بو، تکجه مظفر درفشی‌یه یوخ، اونون ائله بو مجلسیمزده حاضر اولان بیر چوخ هم‌یاشیدلاری و هم‌فکرلرینه‌ده مخصوصدور.

وطنین طالعینی اؤز عؤمور- گونونده و دیل آچان سطرلرینده یاشایان آذربایجان خالقی‌نین مبارز، شاعر اوغلو استاد مظفر درفشی‌نین کئچدیگی حیات یوللاری، گنج نسلیمیزه بیر اؤرنک کیمی‌ معنالانا بیلر. آتالار دئمیشکن: اوت کؤکو اوستونده بیترسه، بس اوندا بیز گنج و اؤرتا نسله، کئچمیشمیزی تانیماق، ملی منلیگیمیزین سؤز عسگرلرینی منیمسه‌مک؛ اونلارین اجتماعی ایده‌آللار اوغرونداکی تاریخی مبارزه‌سینی اؤیرنمک، اؤنوموزده دوران وظیفه‌لریمیزدندیر. بو باخیملا، مظفر درفشی‌نین کئچدیگی حیات یولو ایله علاقه‌دار بیر نئچه جهتی یادا سالماق ایسته‌ییرم.

1305(1926)نجی ایل باکی شهرینده آنادان اولوب، کؤرپه‌ایکن عائله‌سی‌ایله بیرلیکده وطنه دؤنن مظفر درفشی، اون‌ایکی یاشینادک عمرونون بیر قسمینی رضاخان زندانلاریندا کئچیرن مبارز و انقلابچی بیر آتانین تعلیم تربیه‌سی‌ایله بویا- باشا چاتیر.

1317نجی ایل مظفرین آتاسی، دونیاسینی دگیشیر و مظفرین کیچیک یاشیندان امک دونیاسینا قاتیلماسینا سبب اولور. او عائله‌نین بؤیوک اوشاغی اولدوغو اوچون آناسی و باجی- قارداشلاری‌نین مسئولیتین داشیماق مجبوریتینده قالیر.

مظفر درفشی - 80 ایللی گینین مراسمی، دکتر بهزاد بهزادی

1321نجی ایلدن آذربایجان ادبیاتینا ماراق گؤسترن و فارس و آذربایجان دیلینده شعرلر یازان مظفر درفشی‌، 1325نجی ایله‌دک "فریاد"، "ینی‌شرق"، "آزاد ملت"، "وطن یولوندا" و "آذربایجان" قزئتلرینده اثرلرینی یاییر. او، بیر ایل عمر سورن آذربایجان ملی حکومت دؤرونده، "شاعرلر مجلسی"نین تاپشیریغی اساسیندا،  بیر چوخ متن‌لری آذربایجان دیلینه چئویریر و دؤرو مطبوعاتدا چاپ ائتدیریر.

1323نجی ایل تبریز دانشسراسیندان دیپلم آلیر و معلم‌لیگه باشلاییر. عینی حالدا شاهلیق رژیمی علیهینه مبارزه ائدن سیاسی بیر تشکیلاتین فعال عضوی کیمی فعالیت گؤستریر.

1324نجی ایل آذربایجاندا باشلانان ملی نهضتین فعال اشتراکچیسی اولور و آذربایجان دمکرات فرقه‌سی‌ سیرالاریندا سیلاحلی بیر فدایی کیمی دؤیوش آپاریر. آذربایجان نهضتی‌نین غلبه‌سی اوغروندا چکدیگی زحمتلره گؤره، ملی حکومت طرفیندن، مظفر درفشی 21 آذر میدالینا لایق گؤرونور. همن ایلده "تبریزیم" آدلانان شعر دفتری چاپ اولور.

1325نجی ایلین آذر آیینا قد‌ر مظفر درفشی تبریز دانشسراسی‌نین معاونلیگی سمتینده ایشله‌ییر. بو ایشی‌ایله برابر "شاعرلر مجلسی" آدیندان، آذربایجان شاعرلری "علی فطرت"، "میرمهدی اعتماد"، "حسین صحاف"، میرمهدی چاوشی"، "بالاش آذراوغلو" و "یحیی شیدا" ایله برابر "آذربایجان" عنوانلی منظوم مکتوبو یازیر. بیر چوخ شعر و مقاله‌لری، تبریزده نشر اولونان قزئت و درگی‌لرده، خصوصیله "وطن یولوندا" و "آذربایجان" قزئت‌لرینده چاپ اولور.

1325نجی ایلین آذر آییندا، آذربایجان خالقی‌نین ملی آزادلیق حرکاتی شاه قوشونو و آمریکا امپریاسی‌نین سیاستی اساسیندا قانا چکیلیر، مظفر درفشی‌ده حبسه آلینیر. او بیر ایله یاخین شاه زندانلاریندا محبوس اولور.

1326نجی ایل زنداندان آزاد اولوب، تهرانا کؤچگون دوشور. بو شهرده شاهلیق علیهینه سیاسی و اجتماعی فعالیتینه دوام ائدیر، ینی‌دن تعقیبه معروض قالیر. تهراندا ائتدیگی سیاسی فعالیتین ثمری مظفر درفشی‌یه ایکی ایل اهواز شهرینه سورگون اولماغی ارمغان گتیریر.

مظفر درفشی - 80 ایللی گینین مراسمی، دکتر جواد هیئت 1329نجی ایله‌دک خوزستاندا سورگون وضعیتده یاشاییر و اؤز مبارزه‌سینه گیزلی دوام ائتدیریر. بو ایلین سونوندا پلیس قوه‌لری مظفرین گیزلی سیاسی فعالیتیندن باش چیخاریر و اونو توتماق قرارینا گلیر. مظفر قاچقین دوشور، تهران و زنجان شهرلرینده "عباس سیرانی" مستعار آدی‌لا گیزلی مبارزه‌یه دوام وئریر.

1330نجی ایل بویونجا تهراندا نشر اولونان "بشریت"، "بشیر آینده" و "آذربایجان" قزئت‌لرینده مختلف امضالارلا، او جمله‌دن "میم دال"، "م. بشیر" و "مظفر" امضالاری‌لا  اؤز شعر و مقاله‌لرینی یاییر.  همن ایلین شهریور آییندان "اسارت زنجیرلرینی قیران آذربایجانا عشق اولسون" شعاری‌لا نشره باشلایان "بشیر آینده" غزئتی‌نین داخلی مدیری تعیین اولور و یئنه‌ده همن ایلین آذر آییندان نشره باشلایان "آذربایجان" قزئتی‌نین فعال امکداشی کیمی چیخیش ائدیر. بو آذربایجان دیلینده نشر اولونان قزئتلرده مظفر درفشی‌ایله برابر تانینمیش یازیچی و شاعرلریمیزدن گنجعلی صباحی، هاشم ترلان، حبیب ساهر، سهند، علیقلی کاتبی، سعید منیری و علی میثمی‌نینده اثرلری چاپ اولونوردو.  الده اولان معلوماتا گؤره بو اوچ قزئتین باش کاتبی "بهزاد بهزادی" جنابلاری اولموشدور. مظفر درفشی - 80 ایللی گینین مراسمی، ائلدار موغانلی

1332نجی ایلین 28 مرداد کودتاسیندان سونرا مظفر درفشی ینی‌دن توتولور و "عباس سیرانی" مستعار آدی‌لا ایکی ایل "قصر قاجار" زندانیندا قالیر.

1334نجی ایلده زنداندان آزاد اولور و 1338نجی ایله‌دک تهراندا تاکسی سوروجوسو صفتینده ایشله‌ییر. بو ایل عائله قورور و سوروجولوکله برابر تهران یونیورسیته‌‌سینین "فلسفه" رشته‌سینده تحصیل آلماغا باشلاییر.

1342نجی ایل "فلسفه" لیسانسی آلیر، تحصیلینه دوام ائدیر و 1345نجی ایل تهران دانشگاهیندان "روانشناسی و علوم تربیتی" رشته‌سینده یوکسک لیسانس آلماغا موفق اولور.

1345نجی ایلدن، مظفر درفشی "تربیت معلم" مرکزی‌نین فلسفه و روانشناسی اوستادی کیمی ایشه باشلاییر. بو ایش 15 ایل دوام ائدیر و نهایت 1360نجی ایل درفشی جنابلاری معلم‌لیکدن آزاد ائدیلیر.

1350نجی ایلدن باشلایاراق، مظفر درفشی‌نین ادبی فعالیتی قاباریق شکلینده اؤزونو گؤستریر. او بو ایل‌لرده اؤز شاعر و یازیچی دوستلاری‌لا برابر ادبی محفل‌لر قورور و اثرلرینی یایماغا چالیشیر. مظفر درفشی‌نین بو دؤر ادبی- اجتماعی فعالیتی  آذربایجان شاعر، یازیچی و مدنی شخصیت‌لریندن اولان دکتر جاوید، بهزاد بهزادی، محمدعلی محزون، هاشم ترلان، سهند، احمد شایا(آلاو)، قافلانتی و تورک‌اوغلو ایله یاناشی گئدیر.

1357نجی ایل ایران انقلابیندان سونرا، مظفر درفشی‌نین ادبی- مدنی فعالیتینه مساعد زمین یارانیر. او یورولمادان فعالیتینه دوام وئریر، اثرلرینی چاپ ائتدیریر.

1358نجی ایل تهراندا یاشایان بیر سیرا آذربایجان یازیچی و شاعرلری‌نین اشتراکی‌لا "انجمن آذربایجان" تشکیلاتینی یارادیر و بو انجمنین اوچ آیلیق درگیسی‌نین باش کاتبی کیمی چالیشیر. بو ایلده مظفر درفشی‌نین "تبریزیم" آدلی شعر کتابی ینی‌دن نشره بوراخیلیر.

1360نجی ایلدن 1366نجی ایله قدر آجیلی شیرینلی انقلاب گونلری‌نین شاهدی اولان مظفر درفشی، هر بیر امکاندان استفاده ائده‌رک، اثرلرینی یایماغا چالیشیر. بو ایل‌لرده اونون بیر سیرا اثرلری باکی شهرینده نشر اولونان قزئت و درگی‌لرده چاپ اولور،  شعرلرینه تحلیلی مقاله‌لر یازیلیر.

1366نجی ایلده بیر سیرا آذربایجان شاعر، یازیچی و اجتماعی- مدنی شخصیت‌لر او جمله‌دن هاشم ترلان، حبیب فرشباف، حسن ایلدیریم، میرزه (شهرک)، ائلدار موغانلی، احمد پوری و دکتر لطفی جنابلاری‌نین اشتراکی‌لا یارانان "حبیب ساهر" آدینا ادبی انجمنده بیر آق‌ساققال کیمی فعال اشتراک ائدیر.

مظفر درفشی - 80 ایللی گینین مراسمی، هاشم ترلان1371نجی ایل مظفر درفشی‌نین ادبی و اجتماعی فعالیت‌لریندن تجلیل ائتمک اوچون، دوستلاری و پرستشکارلاری طرفیندن تبریز شهرینده طنطنه‌لی بیر مراسم کئچیریلیر.

1373نجی ایل، شاعر دوستلاری‌ هاشم ترلان، رحیم کاویان، میرزه (شهرک)، علی زیرک، مهندس حسینی وکریم قربانزاده جنابلاری‌نین همکارلیغی‌‌ایله "صابر ادبی انجمنی"نی یارادیر و او گوندن بو انجمنین صدری کیمی فعالیت گؤستریر.‌ او ایلدن بو گونه قدر صابر ادبی انجمنی طرفیندن یاییلان، انجمنین داخلی درگیسی‌نین یازیچی‌لار هیاتی‌نین ترکیبنده اوستاد مظفر درفشی‌ده اولوبدور.

1378نجی ایلده اوستاد مظفر درفشی‌نین "منظوم خاطره‌لر" آدلی کتابی نشره بوراخیلیر و اوخوجو رغبتینی قازانیر.

1383نجی ایل اوستادین اوچونجو شعر کتابی "تبریز من" آدیندا، فارس دیلینده یاییلیر.

1383نجي ايل اوستادين اوچونجو شعر کيتابي "تبريز من" آديندا، فارس ديلينده ياييلير.مظفر درفشی - 80 ایللی گینین مراسمی، عزیز محسنی

1384نجی ایل اوستاد درفشی‌نین فارس دیلینده ینی بیر کتابی "هجران و وصال بر بام خیال" آدیندا نشره بوراخیلیر.

1385نجی ایل اوستاد درفشی، صابر ادبی انجمنی‌نین عضوی محمد فاتح جنابلاری‌لا بیرلیکده، بیرینجی نشری 1325نجی ایلده اولان و  60 ایلدن بویانا مستقل نشر اوزو گؤرمه‌ین "آذربایجان" منظومه‌سینی ینی‌دن چاپ ائتدیریر.

و بوگون 1385نجی گونش ایلی‌نین دی آیی‌نین 28 ینده، بیز آذربایجان مدنیتی هوسکارلاری، ادبیات خادملری، شاعر و یازیچی‌لار، ادبی- اجتماعی شخصیت‌لر، خالقیمیزین شرفلی اوغلو اوستاد مظفر درفشی‌نین 60 ایل ادبی- اجتماعی فعالیتیندن تجلیل ائتمک اوچون بیر یئره توپلاشمیشیق و بیر سسله، بیر آهنگله دئییریک:

ای مقدس مسکنیم ، ای شانلی آذربایجان!

بیز سنینله فخر قیللیق یئر اوزونده هر زامان.

قوی وار اولسون ای وطن، اصلان صفت اوغلانلارین!

اؤپسون آلنیندان آنا! اونلار سنین، سن اونلارین.

 

مراسمین شکیل‌لری

 

مظفر درفشی - 80 ایللی گینین مراسمی، حسن ایلدیریم مظفر درفشی - 80 ایللی گینین مراسمی، ابراهیم دارابی مظفر درفشی - 80 ایللی گینین مراسمی، سؤنمز
حسن ایلدیریم مظفر درفشی، ابراهیم دارابی سؤنمز
     
مظفر درفشی - 80 ایللی گینین مراسمی، آقازاده علیایی مظفر درفشی - 80 ایللی گینین مراسمی، مجید امین مؤید مظفر درفشی - 80 ایللی گینین مراسمی، احمد پوری
آقازاده علیایی مجید امین مؤید احمد پوری
     
مظفر درفشی - 80 ایللی گینین مراسمی، رحیم کاویان مظفر درفشی - 80 ایللی گینین مراسمی، عاشیق برنامه سی مظفر درفشی - 80 ایللی گینین مراسمی، عاشیق برنامه سی
رحیم کاویان عاشیقلار برنامه سی عاشیقلار برنامه سی
     
مظفر درفشی - 80 ایللی گینین مراسمی، سئل اوغلو مظفر درفشی - 80 ایللی گینین مراسمی، تامارا درفشی مظفر درفشی - 80 ایللی گینین مراسمی، شهرک
سئل اوغلو تامارا درفشی شهرک
     
مظفر درفشی - 80 ایللی گینین مراسمی،مظفر درفشی، ابراهیم دارابی،  بهزاد بهزادی، جواد هیئت مظفر درفشی - 80 ایللی گینین مراسمی، شکوه آنا مظفر درفشی - 80 ایللی گینین مراسمی، ائل اوغلو
مظفر درفشی، ابراهیم دارابی،
بهزاد بهزادی، جواد هیئت
شکوه آنا ائل اوغلو
     
مظفر درفشی - 80 ایللی گینین مراسمی، مظفر درفشی مظفر درفشی - 80 ایللی گینین مراسمی، سودا وطن سئوز مظفر درفشی - 80 ایللی گینین مراسمی، گیتا درفشی
مظفر درفشی سودا وطن سئوز گیتا درفشی
     
مظفر درفشی - 80 ایللی گینین مراسمی، کنسرت مظفر درفشی - 80 ایللی گینین مراسمی، مظفر درفشی، مرتضی مجدفر مظفر درفشی - 80 ایللی گینین مراسمی، مظفر درفشی، حبیب فرشباف
کنسرت مظفر درفشی، مرتضی مجدفر مظفر درفشی، حبیب فرشباف

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.