آذربایجان

 

 
  ►►► سیاست اجتماعی ملی بین الملل تاریخ  
 

 

حبیب فرشباف

"محمد قاضی نین عزیز خاطره سینه"

سن گئده رکن!

ایزلرینه حسرت یوللار

جیغیر ـ جیغیر سوروندولر

آرخانجا.

سن گئده رکن!

قلمه لر،

یارپاق ـ یارپاق

بویلاندیلار یوللارینا

سحر آخشام.

سن گئده رکن،

داغلاریمین باشین یئنه

دومان آلدی.

بوتون سازلار

سن گئده لی،

یانیق ـ یانیق کرم چالدی.

***

هجرانینی

ائللر ایچره

قاپی ـ قاپی بؤلوشسک ده،

کوچه لره سو سپمیشم گؤز یاشیندان.

ایندن بئله

من کیم ایله بؤله جگم

اوره گیمین آغریسین؟

جی یریمده زهر دادیر

شاه گؤلونون هاواسی دا

سن گئده لی!

آی حکیم لر!

من یاراما

دئیین هانسی بایاتینی باغلاییم؟

یاشیل لاشسین خزان وورموش قلمیم!

هارای علی!

کمانچانی آغی کؤهله،

بم ده چال!

قوی دیل آمان

نارین ـ نارین چیله سین

جادار ـ جادار قلبیمه.

***

کاش کی تکجه من اولایدیم

حسرتی نین دوشگونو،

آنا تبریز

سن سیز یئنه دیزلرینی قوجاقلار.

عزیز دوستوم

سن ائللرین ساراسی سان!

سن ائللرین

آلینماز بیر قالاسی سان!

سن بو خالقین اوره یینده قالاسی سان

عزیزیم!

***

بوتون یوللار

گؤز تیکسه ده یوللارینا

سحر ـ آخشام

آنجاق بونا امین اول سن

سنین یولون

یولداشلارین گؤز به به گی اولاجاق.

 

1386/6/16

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.