بازگشت به صفحه پیشین

حسن جداری

               آلوولار اؤلکه سی!

آذری اوغلانلاری، بس نشر آثارائتدیلر؛

تا جهالت دن، بوتون ایرانی، هوشیارائتدیلر.

سال نظر دقت له، بیر مشروطه نین تاریخینه

طالب اوف لار، گور نئجه، تنویر افکار ائتدیلر.

یازدیلار آیدین اثرلر،  شعرلر، مکتوب لار

خلقی مشروطییته، علمه، هوادار ائتدیلر.

صابرین اشعاری، استبداده قارشی، سس لنیب

ساده بیر اسلوبیله، افکاری، بیدار ائتدیلر.

شاه تا دوشمن لیگین، خلق ایله، اعلام ایله دی

خلق میز، اوشاهی، قدرت دن سالیب، خوار ائتدیلر.

تا اساس ظلمی، ویران ایله سون لر، سربسر

قهرمان ستارخانی، خلقه، سردار ائتدیلر.

ارتجاع، چون ایله دی تبریزه، هر یاندان هوجوم

گور، نه لر، دعوا گونی، غیرت لی احرار ائتدیلر.

ییرتیجی دوشمن لری، بیر بیرازیب، سیند یردیلار

مستبد شاهین، عجب احوالینی، زار ائتدیلر.

بس مجاهدلر، وطن اوغروندا، جان دان کئچدیلر

قانلاریله، صحنه پیکاری، گلزار ائتدیلر.

چوخلاری، صابر کیمی، مجذوب اولوب ستارخانا

تبریزی آلقیشلییب، تحسین ستار ائتدیلر.

ساخلادی مشروطه نی، ستارخانین هممتی

گور نئجه، ستار ایله، تهراندا، رفتار ائتدیلر!

گئتماغا تهرانه، ستارخانی مجبور ایلیب

قهرمان سرداره، اوردا، چوخلی آزار ائتدیلر.

ائتدی آذربایجان، آزاد لیغا، جانین فدا

گور نه لر، بو ملته، مین اوزلی، اغیار ائتدیلر!

تبریزین قانیله، مشروطه یئنه، باش قووزادی

باشچیلیق، بو اؤلکه ده، سویغونچی اشرارائتدیلر.

آلد یلار، بیر باش، زمام خلقی، خائن لر اله

میلتی، فقر و فلاکت له، گرفتار ائتدیلر.

ای آلولار ئولکه سی، ای شانلی آذربایجان!

غم یئمه، گر حق وی، ظلم ایله، اینکار ایئدیلر.

سن بویوک بیر ئولکه سن، سن قهرمانلار یوردی سان

کل عالم، سنده کی ایمانه، اقرار ائتدیلر.

عزم پیکار ایلیون، ای آذری یولداشلاریم!

ایله کی مشروطه ده، ستار و سالار ائتدیلر!