آذربایجان

 

 
  ►►► سیاست اجتماعی ملی بین الملل تاریخ  
 

 

نسخه قابل چاپ

  هادی قاراچای دان ینی شعر کتابی

 

استعدادلی شاعر، تواضعکار انسان و اوره گی هر زامان خلقینه محبتله دوگونن هادی قاراچای دان باداملیقلار آدلی ینی شعر کتابی نشر ائدیلمیشدیر. شاعرین 2000- 2002 ایللرده یازدیقی شعرلری اوزونده توپلایان اثرین سونسوزلوق آدلی بیر پارچاسینی اوخوجولارا تقدیم ائدیریک.

آذربایجان

سونسوزلوق

 

۱

بير گون

دانيشاجاقدينيز سيز ای سيلديريم قايالار

سوموکلرينيزده

قيلينج ياراسيندان بيتميش آرديجلاردان.

منسه

آنا دؤشونده کؤرپه جيک

دينله يه جکديم او ايلکين ناغيلی

لايلالار، نازلامالار کيمی .

 

          *
آجی ياغيشلاردان گؤيه رميش

شيرين بيتگيلر کيمی،

دايانيب ديک،

غرورلو قالالاريميز.

قوی، بير قولو اولماسين قاپيلارينين.

داملاريندا

ديره کلردن ايز گؤرونمه سين.

بير داش،

يالنيز بير داشی يئتر

دونيانين عؤمور ناغيلين اوخوتماق اوچون.

 

          *

بوی بويلامالاردان کئچميش

سؤی سؤيله مه لردن آشميشدير ايشيميز.

قيش قاباغی

آستا گلن قار اؤرنه يی دير پيچيلتيلارينيز.

سئويشديز سسسيزجه سينه .

ديلينيزی بيلن، سولار اولدو-

ساحيللره دوداق باسارکن ،

اوتلار اولدو
تورپاقلا سئويشرکن.

قيرميزی آلما آتديق آرازينين بو تاييندان او تايينا

قيرميزی يايليق ده به رتديلر آرازينين او تاييندان بو تايينا.

آغريسينی چکمه ديييميزدن

دردينی

ياشاماديغيميزدان

نه يويره ک گليردی بيزه کئچميشلر.

سيزسه سسسيز

سيزسه

بولاق قايناشماسی تک ساکيت گؤروشدونوز.

بولود توپالارينين آنليق گؤروشمه سيندن چئشيدلی

نه شيمشک چاخماسی

نه ايلديريم شاخماسی.

بؤيله اولورموش

سيلديريم قايالارين عصرليک سئويشمه لری.

 

          *

آخ، سيز ای گئجيکميش قارانقوشلار

بيزه گلرکن،

گؤره جکسينيز،

ده ييشميش بوتون ناغيللارين باشليقلاری.

ايته آت

اته اوت سؤيله يه نلر گؤره جکسينيز.

و اوزونوز کيمی هامار ديلينيز

چاشاجاقدير ده لی ده ييشمه لردن.

گؤزلرينيز شاشقين-شاشقين باخاجاق

آغاجلارين باش-آياق گؤيه رمه سينه.

آلما آغاجلاريندا آغی

داغداغانلاردا قاراميخ کوللارينا توشلاناجاق

قاپ- قارا گؤزلرينيز.

و سيز

اونوتدوغونوز کيمی

اونوداجاقسينيز

او ايلکين ناغيلی.


 

۲

بير داها چيخمادی او بؤيوک ايشيق.

بير داها گؤرونمه دی

تورکمن چای دوزه نينده باتان گونش.

و اوزون، اؤلومجول يوخويا دالدی

گولوستان باغلاريندا شئهلی چيچکلر.

قادينلار ساققيز چئينه يير

و کيشيلر

توتون تورباسيندا گيزله ديرلر آزارلارينی.

کولکلرين دؤيه جينده

اوزون-اوزادی اوزانميشدير چانقيللی تورپاق.

و کيمسه نی ماراقلانديرمير

داغيلميش ماراق اينجيسی

او بؤيوک ايتگی.

شهرلريميز شيشدی

کندلريميز آرتدی.

و گونو گوندن بؤيودو

يوردا داغيلميش اينسان کؤلگه سی.

قوللوغوموزا اينانماديق،

قول بازارلاريندا

ساتيلماديغيميزدان.

آغاج

باری اوستونده ساتيلان تک

ساتيلميشديق.

اکيلن اکينلرله

بيچيلن بيچينلرله

بؤيله جه.

ساوادسيزدير دئيه

قينانماديلار قارا ياخالار

و آيدينلاريميز گه وشه ديلر

يابانجی کؤکده بيتميش سؤز آلاخلارين.

ديل

ائل

يورد

تالانديلار،

گوز کولکلرينده تالانميش آغاج کيمی

چؤلده چالی

کؤيده

قه پيک-قوروشلارين جينگيلتيسی اولدو اينسان حؤرمتی.

آج قوشلارين داری يوخوسوندا

تامودان اوچماغ قوخوسو چکديلر

و اللری دؤشلرينده،

باغری باسيق

قاپی آغزيندا تاپی دا دوردولار ده ده لر.

آخ،

توکه نمه دی

قورتارمادی

اوره کلرينين يوکوش سايقيسی.

آزادليق

يوزومسوز يوخويا دؤندو.

شيطان ديلينده سؤيلنميش ناغيلدی،

قان قوخويان

گؤل ايدی آزادليق.

سوسدولار

ائولرينين قالين توفارلاری آرخاسيندا،

سوسدولار

پولون و مولکون نملی کؤلگه سينده.

سوسدولار قادينلارينين چادراسی آلتيندا،

سوسدولار قورخولاريندا.

و قورخونون اييله نميش لؤهمه سيندن

اوجا هئيکل ياراتديلار،

قادين هئيکلی.

آدی دوستلوق

آدی ايران.

بؤيله ياشاديلار گولوستاندا

ايينلری چيخاريلميش ﴿﴿قهرمانلار﴾﴾

بؤيله ياشاديلار

تورکمن چای داغلاريندا

سويوم-سويوم سويولانلار.

اؤزگورلوک،

هر ائودن اؤلدورولموش بير اوغول ايدی.

وارليلار

وارلارينا ساتديلار قان باهاسينی،

يوخسوللار

يوخلارينا.

و بؤيله جه

هر کس اؤز ائوينده قويلادی قويلانماز جسدی.

ای هئی... سيلديريم قايالار!

سيزه

﴿﴿آنام﴾﴾ دئمه يه اوتانماياجام.

بير گون دانيشاجاقدينيز

سوموکلرينيزده قيلينج ياراسيندان بيتميش

آرديجلاردان.

بير گون دانيشاجاقدينيز

او قهرمانلاردان.

 

۳

آغاجلار، يورقون.

کيرلی چيمنلر اوستونده

بيتله نير چه کيرتگه لر.

تورپاغا ديره نميش بارسيز بولوتلار.

گؤرونتوده بوشلوق،

گؤرونتوده

گؤرکمسيز يورد.

اوچ بوجاق دئييل

دؤرد بوجاق دئييل

ايلغيم کؤينه يينده

ايتی سيوريليب کئچميش ايلان له پيريدير بو يورد.

نه دونه نی

نه بو گونو.

اييليب، تيکانلاريندان اؤپمکدير

و يانميش قوملارينا دوداق باسماقدير شعريم.

قيساجا تاپينماقدير آزادليق هئيکلينه.

گؤزلريمی يومورام.

آچيلير باغلی قاپيلار بيرر-بيرر.

بيرينجی قاپی.

داريسقال کوچه لرده آتيشما سسی.

باريت قوخوسو،

اوزه رليک يوخوسو،

اؤلوم کؤلگه سينده سؤنن بايراملار...

بايراقلار ايسه

تورپاغين اؤز رنگينده. قيرميزی.

ياشاماق،

بوتون دردلرييله

سونوجدا لذتيميش.

ارکين يوخوسوز گؤزلرينده

سئوينج.

و خانين دوداقلاريندا

شيرين تبسسم.

آخ منيم مهربان يوردوم

اؤلوم،

بيزی اؤلدورمک اوچون نه سارساق حربه يميش.

ياشا ای اوجا زيروه.

ياسمن قوخويان ياناقلاريندان اؤپمکدير

و سئحيرلی تورپاغينا دوداق باسماقدير ياشام.

بوللوق ياغيشين ياغار

خوشلوق سئلين آخار

و جوشقو آلوولارين يانار دورسون آنام!

بو گوندن صاباحا اوزانان اومود لاغيمی ايميش،

اينسانين

گولوش حاققی،

سئوينج پايی ايميش آزادليق.

آنا ديلينده اوخونان ماهنينين هيجانی،

فعله نين

لذتله ايشدن آيريلماسی ايميش آزادليق.

گؤزلريمی آچيرام،

ايللر کپنک کيمی اوچوشور اينجه.

گؤزلريمی يومورام

باغلانير بيرينجی قاپی دومان ايچينده.

آتابی باغی

نامرد توزاغی

غفيلدن گلن گولله،

تيترشن ديز

سيخيشان ديش

و خانين دوداقلاريندا آجی تبسسم

آخ منيم مهربان يوردوم

اؤلوم

بيزی اؤلدورمک اوچون سارساق بير حربه.

ياشا ای اوجا زيروه.

ياسمن قوخويان ياناقلاريندان اؤپمکدير

و سئحيرلی تورپاغينا دوداق باسماقدير اؤلوم.

ايشته من بوردايام

ايشته بيز بورداييق

وئرديييميز حالال اولسون آنام،

و اولو کؤلگن کسيلمه سين تورپاغيميزدان!

 

          *

و سندن سونرا ای شيرين يوخو، اولو قورتولوش!

آنا امجه يين کسنلر واردی.

شهرين باغلی قاپيلارينا دوزدولر گولوش ائلچيلرين.

پوزدولار

بوللوق ياغيشينين شيرين ياغارين.

کسديلر

خوشلوق سئلينين آخارينی

و سوندوردولر جوشقو آلوولارين

بويلو قادينلارين ييرتيلميش قارنيندا.

تبريزين ميل چکيلميش گؤزلرينده درد.

آزادليق،

کوره ييندن وورولموش قارداش.

و اومود،

خزرين ده رينينده ياتميشدير سسسيز.

گؤزلريمی آچيرام،

ايللر، سولارين آخيميندا گئدير

 آستا

 و يومشاق.

گؤزلريمی يومورام،

آچيلير ايکينجی قاپی،

ساعات قاباغيندا

شئيخين آزادليق سسی.

اريک بوداقلاريندا خينالی تومورجوقلار،

و قاردان باش قالديران ساريشين قار چيچکلری.

ياشاماق،

بوتون دردلرييله

سونوجدا لذتيميش.

آزادليغا بويلو شهر

چيچه يه بويلو تورپاق،

و ياشاماق اوغروندا چيرپينان انسان

آند ايچير بيرليکده

اويانميش شرفه.

آغير يوخودان

اويانميش گؤی مچيد.

انسان،

صاباحا اومودلو،

و سئوينجه آچيلان پنجرلرده ياشام ماهنيسی.

آخ، آزادليق

ايشين و گوجون

بؤلونمه سييميش.

و سئوينج،

انسانين توتدوغو پای ايميش

ايشدن و گوجدن.

گؤزلريمی آچيرام،

دورنالارلا بيرليکده کؤچور سئحيرلی گونلر.

چکيلير سولاری قورو گؤلون،

و باليقلارين اييله نميش لئشی، قوراقليقدا.

گؤزلريمی يومورام،

داغيلميش شهر.

ازيلميش چيچک.

باسيلميش شرفه ياس توتموش انسان.

داريسقال کوچه نين داش دؤشلرينده

شئيخين قارا ساققاليندان سوزه ن


آزادليق قانی.

يانکی لارين قيزيل گولله سی

کؤکسونده.

و تبريزين بو باشيندان او باشينا اوزانير قيرميزی کؤلگه.

آخ، ای اوجا زيروه

حسرتينده

آچيق گؤزلرله

يوخولار گؤرور يارالی تبريز.

يودوقجا يويولمور کوچه لريندن قان لپيرلری.

دووارلاريندان

گولله ايزی،

و انسانلارين آلنيندان

قونداق يئری

سيلينمزدير.

دوغروسو

اؤلوم، بيزی اؤلدورمک اچون

نه سارساق حربه ايميش.

گؤزلريمی آچيرام،

کوچه لرده قان

دووارلاردا گولله ايزلريندن بير شئی يوخ.

کيشيلر

گليشده،

قادينلار، گئديشده.

بازاردا خوروز دؤيوشدورور گنجلر.

و مکتب يولوندا تله سير آجی جوجوقلار.

نه قدر بؤيوکدور قوجاغی آنا تورپاغين.

دونن

دونه نين توزوندا ايتگين،

و بو گون

بئش تومن کاسيبچيليق دردی دير دردی انسانين.

اؤلومون قانلی پنجه سيندن بويلانير ياشام

و آزادليق،

داشی پارچالايان

ياشيل بير مامير.

و بؤيله جه

آختاريشدان

اوزون ناغيللار سؤيلر سيزه

باشماقلاريمدا اوتوران توزلار.

و چيينيمده

آغير بير هئيبه وار دؤزوم يوکوندن.

ايشته

باغلی بير قاپی آغزيندايام.

قورتارماز اومودلا

توکنمز ايناملا دؤيورم

 اؤزگورلوک قاپيسين.

منم!

اييرمينجی يوزايلليين ايلکين اوشاغی.

او بؤيوک ده ده نين آغ ساچ نوه سی.

گؤزلريمی يومورام

آچيلير تبريزين شيرين گونلری،

و تورک انسانينين انسانليق چاغی.

ديلی ديل

ائلی ائل

يوردو يورد اولان تبريز.

آخ، ای اوجا زيروه

نئجه ده دادلی دير سنين يئميشين.

آنا سوتوندن دوغما

قيز دوداغيندان شيرين

قادين دؤشوندن دادلی.

انسانين گليش حاققی

گئديش حاققی،

انسانين گولوش حاققی.

سازين هر تئلينده

يئنی بير سس.

و کولون هر گولونده

باشقا بير قوخو.

انسانين، انسان حؤرمتی ايميش آزادليق.

اؤلوم توفارلارين آشاراق گلديک

و ياشام دوزه نينده چادير قوردوق.

پای آلديق

ايشدن و گوجدن.

پايلاشديق انسان اورمانيندا

انسانا ياراشان دوزه ن قورماغی.

بير ايلده

مين عؤمور ياشاديق.

ارکين، اونوتماياجاغی

گؤی مچيدين گؤرمه دييی

ده رين بير عؤمور.

آنا سوتوندن دوغما

قيز دوداغيندان شيرين

قادين دؤشوندن دادلی.

گليش حاقلی

گئديش حاقلی

گولوش حاقلی.

سسلندی سازين هر تئلينده يئنی بير سس.

و کولون هر گولونده باشقا بير قوخو.

قوروندو انسانين انسان حؤرمتی.

نه قده ر اوزون ايدی

نئجه ده قيسايدی او ايل.

گؤزلريمی آچيرام،

دوغودان اسمکده سازاقلی کولک.

دوغودان دوغماقدا بوغونتو سسی.

تبريزه آخيرميش بوتون قانلی چايلارين آخيمی.

اؤلوم

چارداق قوردو، شهردن بؤيوک.

کسيلن باشلار

دئشيلن دؤشلر

يولونان ساچلار.

و اؤزگورلوک

هر ائوده ن اؤلدورولموش بير اوغول اولدو

وارلی لار،

وارلارينا ساتديلار قان باهاسينی

يوخسوللار، يوخلارينا.

و هر کس

اؤز ايچينده قويلادی قويلانماز جسدی.

سهندين دؤشونده يارا

و ساوالان

يالقيز قالدی کؤهنه قارييلا.

باسيردی شهری ايلغيم کؤلگه سی.

سوروشکن تورپاق،

يانميش قوم.

و هر آدديمدا

سيزيلدايان چالی قوشلاری.

نه دؤرد بوجاق

نه اوچ بوجاق،

گؤرکمسيز.

ايلغيم کؤينه يينده

ايتی سيوريليب کئچميش

ايلان لپيريدير بو يورد.
اييليب

تيکانلاريندان اؤپمکدير،

يانميش قوملارينا دوداق باسماقدير شعريم.

قيساجا،

تاپينماقدير

آزادليق هئيکلينه.

ييرمينجی يوزايللييين ايلکين اوشاغی

او بؤيوک ده ده نين نوه سييم من.

يوز ايلدير

ديليمده قيفيل،

آلنيمدا قوللوق دامغاسی

اللريمده تاپی قاندالی.

بؤيله دوغور

بؤيله ياشار

بؤيله اؤلورم.

ديليم،

قورتولوشا،

آلنيم،

بوتون قوتسال وارليقلارين آستاناسيندا داش اولماغا

اللريم

قلم توتماغا

قولاقلاريم

او ايلکين، او بؤيوک ناغيلا

سوسوزدور آنام.

 

          *

آخ، کيم؟

کيم اويالداجاق سيزی بو اؤلومجول يوخودان؟

هانسی قارا بولود

هانسی يئر تيتره مه سی

هانسی قان قوخوسو؟

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.