آذربایجان

 

 
  ►►► سیاست اجتماعی ملی بین الملل تاریخ  
 

 

حسن جداری

قووزانان طوفان دی، آذربایجان!

جسمه، سانکی جان دی، آذربایجان

عشوه لی،جانان دی، آذربایجان

ای گوزل لریوردی،ای شانلی دیار

جان سنه قوربان دی، آذربایجان

داغلاری گول دور،کیچک دور،لاله دور

توپراغی، مرجان دی، آذربایجان

حسرتینده یانمیشام ایللربویی

صبرائوی، تالان دی، آذربایجان

وصلینه مشتاقم اما نیلیوم

قسمتیم، هجران دی، آذربایجان

سنده کی شان و جلال وشوکته

عقل اؤزی حیران دی، آذربایجان

کیمسه کی ، تاریخینی انکار ائده

سؤزلری، هذیان دی، آذربایجان

خلقینه، اولادینه تهمت یاخان

بیل کی بی وجدان دی، آذربایجان

قهرمان تاریخینین،هر صفحه سی

قانلی بیر عنوان دی، آذربایجان

حقیّ نا حقّ ایلی ین د وشمن لرین

نفرته شایان دی، آذربایجان

ارتجاع نین ظلمی چون حددن آشیب

چاره سی ، عصیان دی، آذربایجان

محو ائدیب آزادلیقی، انسانلیقی

یئرتجی حیوان دی، آذربایجان

 

               ****

 

بابکه، ستارخانااولموش وطن

سنگر ایمان دی، آذربایجان

مسکن اولموش قهرمان حیدرخانا

اوغلی، باقرخان دی، آذربایجان

وار نسیمی تک، ایگیت اوغلانلاری

مرکز طغیان دی، آذربایجان

معجز و صابر کیمی سیمالره

عرصه جولان دی، آذربایجان

باش گؤزوندن هر گلن، بیر اوخ وئریب

قانینه غلطان دی، آذربایجان

قووزانیب آه و فغانی گؤیلره

سینه سی، سوزان دی، آذربایجان

ظلم دن، تحقیر دن، تبعیض دن

خسته دی، نالان دی، آذربایجان

غارت اولموش بیر به بیر ثروت لری

سر بسر، ویران دی، آذربایجان

ظلمه تسلیم اولمایان انسانلارا

قورخولی زندان دی، آذربایجان

قلبینه دوشمن وئریب مین لر، یارا

لخته لخته، قان دی، آذربایجان

ایندی ده "بهرنگی" یه، "دهقانی" یه

گؤزلری،گریان دی، آذربایجان

 

               ****

باخما ساکت اگلشیب بیر گوشه ده

قووزانان طوفان دی، آذربایجان

تا اسارت زنجیرین، کوک دن قیرا

عازم میدان دی، آذربایجان

دوشمنه تا قدرتین وئرسین نشان

خنجر براّن دی، آذربایجان

قورخو سالمیش ارتجاع نین جانینا

سانکی بیر اصلان دی، آذربایجان

دور ماسین قاچسین اونون دوشمن لری

حیرصیلی، قافلان دی، آذربایجان

اود، یاغیر هر کلمه سیندن شعریمین

سانکی بیر ولکان دی، آذربایجان

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.