آذربایجان

 

 
  ►►► سیاست اجتماعی ملی بین الملل تاریخ  
 

 

حسن جداری

ای قهرمان تبریزیم!

یاشا یاشا ای قهرمان، تبریزیم

ای اودلارا دائم یانان، تبریزیم

تاریخ بویی، آزادلیقین یولوندا

زحمت چکوب جان یاندیران، تبریزیم

باقرخان تک ایگیت لرین مسکنی

سن بسله دون ستارخان، تبریزیم

واردور سنون، حیدرخان تک شیرلرین

داغلاریندا گزر، اصلان، تبریزیم

استبدادین قول قانادین سیندیریب

علی مسیو، حسین باغوان، تبریزیم

اوغلانلارین خیابانی، ارانی

بهرنگیه اولدون مکان، تبریزیم

یوزلر، مین لر، فدائی لر ، سنون دور

هربیری، بیر شیر ژیان، تبریزیم

آدین، سانین ،هر دیارا یاییلوب

عالم سنه اولموش حیران، تبریزیم

الهام آلیر سندن بوتون اؤلکه میز

ایگیت لرین یوردی اولان، تبریزیم

سؤندوره نمزدوشمن سنین اودووی

سیننده، مین آتشفشان، تبریزیم

 

                  ****

اصلان کیمی، دوردون گینه ایاغا

جبهه لرده، ائتدین جولان، تبریزیم

چکد ین گویه، ستارخانلار بایراغین

ظلمه قارشی، ائتدین عصیان، تبریزیم

سالدین قورخی، دشمنلرین جانینا

جانیم اولسون سنه قربان، تبریزیم

اراده وی، قدرتوی، شانیوی

دشمنلره وئردون نشان، تبریزیم

قان توکولدی دیواریندان داشیندان

دعوا گونی، ای قوجامان، تبریزیم

آخدی قانین، کوچه لرده، سئل تکین

ئوز قانیوا، اولدون غلطان، تبریزیم

دسته دسته ایگیت لرین، اؤلدولر

باغرین اولدی غم دن القان، تبریزیم

شهید لرین قانی، یئره تؤکولموش

باش گؤزوندن قانی آخان، تبریزیم

دوشمن بیزیم بو ائل لری ازه نمز

تؤکولسه ده، مین لرجه قان، تبریزیم

سلام اولسون قورخی بیلمز ائلیوه

آنا یوردوم، ای قهرمان، تبریزیم

دوشمنلردن، ائل انتقام آلاجاق

قالمیه جاق یئرده بو قان، تبریزیم

 

                ****

شانلی وطن، ای آلولاراؤلکه سی

ای سئوگلیم، ای مهربان، تبریزیم

سنگرلرده، دؤیوشلرده، جبهه ده

داغلار کیمین ، محکم دایان، تبریزیم

گونش تکین ایشیقلاندر ائل یولون

چراغ اولوب هریاندا، یان، تبریزیم

اسارتین زنجیرلرین قیرگیلن

دشمنلره وئرمه امان، تبریزیم

آلچاقلاردان، قولدورلاردان، قوردلاردان

قویما قالا بیرده نشان، تبریزیم

 

            ****

بیرگون گلر، قارا گونون قورتولار

اوزون گولر، اولار خندان، تبریزیم

اسارتین زنجیرلری قیریلار

آزاد یاشار هر بیر انسان، تبریزیم

ظالم لرین تفاق لاری، داغیلار

ظلمین ائوی، اولار ویران، تبریزیم

گل لر آچار چمن لر ده، باغلاردا

بولبول لرین اوخور الحان، تبریزیم

لاله بیتر شهیدلرین قانین دان

هریان اولار بیر گلستان، تبریزیم

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.