|
||||||
       |
||||||
|
|
اوجو ایتمیش كلف بهرام صادقی
فارسجادان ترجمه: حمید بخشمند گؤزه گؤرونمهین بیر شئی وار، ال كیمی. من اونو گؤرمورم، آما حس ائدیرم، دوشونورم اونو. منی ایتلهییر اویان – بویانا… 000000 - آ…ها! بیر بالاجا باشینیزی یوخاری قووزایین؛ گولون. گؤزلریز شکل آپاراتینا باخسین. اوچهدك ساییرام. ترپنمهیین كی شکلینیز خراب اولار.حاضر اولون! بیر… ایكی… اوچ. * * * ایكی گئجه اوندان سونرا، شکلخانانین پلهكانیندان اوسته چیخیردی كی شکلینی آلسین. شکلچی وئرن قبضی اووجوندا سیخیردی. یادینا گلدی كی ایكی گئجه اوندان اوّل شکلچی سوروشموشدو: - آدینیز؟ و او آدینی دئمیشدی. -عادّی اولسون: 4×6 ؟ پُستال كارتی نئجه؟ و او جواب وئرمیشدی: - بیر دنهسی اؤرنك اوچون. - صاباح یوخ، بیریسی گئجه حاضردی…ساعات سككیزده. قاپینی آچمامیش ساعاتا باخدی. سككیزی كئچمیشدی. اؤز- اؤرونه پیچیلدادی: - شبههسیز كی ایندی حاضردیر. شکلچینین شاگردی ماسانین آرخاسیندا اوتورموشدو. اونو گؤرجك آیاغینا دوردو. او ایسه سلامین جوابینی وئرندن سونرا بیر اِستولون اوستونده ایلشدی. شاگرد تانیماماقدان اونو سوزدو: - دئیهسن اؤزو یوخدو؟ - نییه… نییه … بوراداایدیلر. - بو قبض… قبضی جیبیندن چیخاریب، ماسانین اوستونه قویدو. شکلچی شاگرد اونو گؤتوروب، اوخویوب، سونرا باشینی احتراملا ترپتدی: - بلی قوربان، ائله بو گئجهیهدیر… آما گرهك دوزهسینیز كی اؤزو گلسین. ایستهییردی دئسین: « ایش – گوج… » استولون اوستونده اوتوردو. شاگرد دوشونوردو كی او ، ایش- گوجونو بوراخیب تا كی گلیب شکلینی آلسین و ایندی كی شکلچی یوخدور، یقین كی آجیقلیدیر. آما نه ائده بیلردی؟ فكرینه گلدی كی بیر شئیله اؤزونو مشغول ائلهسین. باشلادی بیر آلبومو واراقلاماغا… او سوروشدو: - گلمیهجك؟ - نییه گلمیهجك؟ ایندیجه… و او دیواردان آسیلمیش شکللره باخماقلا مشغول اولدو… * * * اون بئش دقیقهدن سونرا شکلچی گلدی. ائله یولدان یئتیشمهمیش سؤز آچدی: - خوش گلیبسینیز قوربان. و شاگردینه دوغرو: - آقا چوخدان تشریف گتیریبلر؟ و یئنه ده اونا: - ایندیجه خدمتینیزه تقدیم ائدهرم. او ایسه، استولدان قالخیب ماسانین قارشیسینا گلدی. ایكی الینیده ماسانین قیراغینا قویوب، انتظار چكدی. شکلچی ایش اوتاغیندان شکللری گتیردی. - قوی گؤروم بودور؟ بعلی، اؤزودور. او الینی اوزالدیب شکللری آلدی. بیر آز باخاندان سونرا: - بونلار دئییل .سهو ائدیرسینیز. - نئجه؟ بویوردوز… - سهو ائدیرسینیز. منیم بیغیم یوخدور، بو شکللرین بیغی وار… اوندان علاوه من باشیما پاپاخ قویمارام. شکلچی تئز شکللری آلیب، اولجه دقتله اونلارا، سونرا اونون سیماسینا باخدی: - غریبه دیر… آما سیزه چوخ اوخشاییر. - اوخشاییر؟ واللاه نه عرض ائدیم… داها بوراسین دوشونه بیلمیرم. شکلچی بیر آز دورخوندی. شاگردی بیر آز اؤنجه دیشاری چیخمیشدی (نه ایش گؤردویونو بیلمهدن چیخمیشدی دیشاری ). گئدیب ایش اوتاغیندان بیر دسته باشقا شکل گتیریب، سردی ماسانین اوستونه. اونلاری آرایا- آرایا دوداغی آلتدا پیچیلدادی: - بونلار كی دئییل… بیر قیزین شکلیایدی. - بودا دئییل. بیر قادینینكیایدی. - بودا یوخ. بیر اوشاغینكیایدی. - بو؟ بیر شکله، بیرده اونا باخدی: - بو سیزه چوخ اوخشاییر. پاپاغیدا یوخدور…آما یئنهده بیغی وار. او ایسه، باشینی ایرهلی آ پاردی: - گؤروم…پاپاغی یوخدور… سؤزونه دوام ائتدی: - آخی "بو سیزه اوخشاییر" نه سؤزدور؟ من هاردان بیلیم كی اؤزومونكیدور؟ من كی اؤز- اؤزومو گؤرمورم، یادیمدا دئییل كی نه تهردیر. آخی ایشلرینیزین قایداسی، نظمی یوخدور كی شکللر اویان- بویان اولماسین؟ نمره وورمازسینیز؟ - نییه…نییه نمره ووراریق. ایشیمیزین قایداسیدا وار ، نظمیده. آما آمان ناشی آدامین الیندن. بو شاگرد هامیسینی ویریب بیر- بیرینه. قاتیب- قاریشدیریب. مثال اوچون بورا بیر دقت بویورون ، اوچ دسته شکل وار كی هامیسینین اوستونده سیزین قبضینیزین نمرهسی وار… عؤمروموزون سون چاغلاریندا اؤزوموزه ایش آچیب، شاگرد توتدوق! ائله بیل داغ دالیندان گلیب… هئچ بیر شئی باشا دوشمور… - سؤزون آخیرین دئه گؤروم. من نئیله ملییم؟ هاچانادك بورادا دوراجاغام، جناب شکلچی باشی؟ شکلچیایسه یئنهده شکللری آراماغا باشلادی. - بودا دئییل. بیر تاریخی بنانین شکلیایدی. - آها… اؤزودور. او شکلی قاپدی. - نئجه كی اؤزودور؟ هئچ نهیی منله اوخومور. منیم ژاكئتیم هاردا بئلنچیایدی؟ شکلچی اوتوردو. حوصلهسیز جواب وئردی: - داها بیزه ربطی یوخدور. بلكهده ایسراغا گون پالتارینیز او جورایدی، بو گون دگیشیبسینیز؟ - هئچ بئله ایشین اصلی یوخدور. شکلچی یئنه آیاغا قالخیب، چیگینلرینی آتدی: - داها بونلاردان ساوای باشقا شکلیمیز یوخدور. بونلاردان بیریسیدیر... او دیشلرینی بیر- بیرینه سیخیردی. بیر آز آرام اولاندان سونرا دئدی: - بونلارین هئچ بیری منیم شکلیم دئییل. آلتی دنه دؤرد- آلتی، بیر دنه ده پستال كارتی، پولونودا آلیبسان، گرهك تحویل وئرهسن... شکلچی اوچ دسته شکل اونون قاباغینا قویدو. - سیزین تحویلینیزده، بی! حیرصلنمك یئری یوخدور. من كی باش قورتارا بیلمیرم. هر اوچوده سیزه اوخشاییر، سیزین شکلینیزدیر. بیری بیغلی- پاپاغلی ، بیری بیغلی- پاپاغسیز ، بیریسیده هم بیغسیز ، همیده پاپاغسیز. هر هانسینی عشقینیز چكیر گؤتورون... - عشقیم؟ اولمیا عشقیلهدیر؟ جناب شکلچی باشی! یا سنین باشینا هاوا گلیب، یادا كی منی اله سالیبسان. جانیم، سن ایش آدامی دئییلسنمی؟ هئچ سنین مشترین اولماییبمی؟ یا ایستهمیرسن ایشلهییب بیر تیكه چؤرك قازاناسان؟ دونیانین هاراسیندا گؤرونوب كی بیر نفر گئدیب شکلینی آلاندا، اوچ دسته شکل تؤكهلر قاباغینا، سونرادا اونو اله سالیب دئیهلر كی اوچوده جنابینیزین شکلیدیر، هر هانسینی كؤنلون چكسه گؤتوره بیلرسن؟ ایسراغا گون مگر كورایدین؟ نه بیغیم وارایدی، نه پاپاغیم، نهده كی ژاكئتیم بئلنچیایدی. شکلچی داها جانا دورموشدو. اللرینی بیر- بیرینه سورتوب سعی ائدیردی كی داشماسین. احترام و دؤزومله دئدی: - بو سؤزلرین هامیسی دوز، هامیسی منطقی، منیمده قبولومدور. آنجاق منیم بو آخماق شاگردیمین گناهیدیركی بونلاری قاتیب- قاریشدیریب، یوخسا ائله اوّلجه- یوباتمامیش تقدیم ائدردیم، بیر بئله سؤز- صحبتده گركمزدی. آما منیم اوچون تعجبلو یئری بوراسیدیر كی نئجه اولا بیلر بو اوچ شکل هامیسی سیزه اوخشاسین. لاپ ائله بیلین كی دوز اؤزونوزسونوز. داها بیلمیرم سیزینكیدیر یا سیزه اوخشایان بیر باشقا آدامینكی... بیلمیرم سیزین اصل شکلینیز نئجه اولوب... آخی نئجه اولا بیلر... نئجه اولا بیلر كی سیز اؤز سیمانیزی تانییا بیلمیهسینیز؟ - مگر سیز تانییا بیلرسینیز كی منده تانییا بیلم؟ - نییه تانییا بیلمرم؟ سیز ایندیجه بیر شکل گؤسترین منه، هر هانسی واختین كی اولورسا، اولسون، تئز دئییم منیمكیدیر یا یوخ. تعجب ائدیرم... - تعجب ائدیرسن؟ مگر گرکدیر دونیانین بوتون آداملاری اؤز شکللرینی سئچه بیلسینلر؟ باخما اؤزونه كی شکلچیسن، ایشین بودور. هانسی تویوق اؤز یومورتاسینی سئچه بیلر؟ گؤر نئجه جاماعاتی آلدادیرلار...اوچ- دؤرد گون اویناداندان سونرا، ایش – گوجدن قویاندان سونرا، او واخت جواب وئریرلر... شکلچی آز قالمیشدی آغلاسین. جیبیندن بیر گوزگو چیخاریب وئردی اونا: - دای بو كی چتین ایش دئییل. باخ! گؤر شکللره اوخشاییرسان یا یوخ؟ او، گوزگونو آلیب باخدی. سونرا ائله گوزگو الینده اولاركن استولون اوستونده اوتوردو. دوداغی آلتدا آجی- آجی پیچیلداییردی. بیر آز كئچمیش، بیردن- بیره گوزگونو شکلچییه وئریب، باشینی اللرینه آلیب سیخدی. شکلچی یاواشجا سوروشدو: - گؤردون؟ او ایسه دوروب، یئنه گئتدی ماسانین قاباغینا. بیرده شکللری گؤتوروب باخاندان سونرا وئردی شکلچییه. شکلچی دئدی: - اگر بیر آز بورادا اوتورسان، شکللرین ییهلری هامیسی گلرلر. منجه پیس اولماز اؤز تای- توشلارینی تانیسانسا. او ، قاپییا دوغرو گئتدی: - هامیسی فیریلداقدیر. بونلارین هئچ بیری منیم شکلیم دئییل. بیلمك اولمور منیم اصل شکلیم نئجه اولوب. اصلا اولا بیلر كی كؤكوندن منیم شکلیمی گؤتورمهمیسیز. كول باشینیزا بو شکل گؤتورمهییزله. او دیشاری چیخاندان سونرا شکلچی دلیلر كیمی باشلادی اوتاغی فیرلانماغا. - آز قالیب دلی اولام الاهی. نئجه اؤزونو تانیمادی؟ نئجه بو شکللر هامیسی اونا اوخشاییردی؟ آز قالیب... آز قالیب اؤزومو پنجرهدن توللایام آشاغی. شاگردی ایچری گیردی: - عمی شکللرینی آلدی؟ گؤردوم گئدیردی قارشیمیزداكی شکل خانایا. (سون) |
|||||
|
"آذربایجان"
دا
یازیلان مطلب لردن
باشفا سایت لار ویایینلاردا
فایدالانماق، |
||||||
