آذربایجان

 

 
  ►►► سیاست اجتماعی ملی بین الملل تاریخ  
 

 

احد واحدی

  "بابک"

باباک قالاسی، یغیمجا

تاریخین دولایلاریندا

بیر فریادسان بیر سس سن!

ظلمتین باغرین دئشن،

سؤنمه ین بیر گؤنش سن!

اسارتین ضدینه،

یوکسه لن شن بایراقسان؛

دایانیش بایراغی،

ظفر بایراغی!

عدالت موشدولوقلو،

یانان نورلو چراغسان؛

خوشبختلیک چراغی،

امید چراغی!

 

          ***

 

بابک، بابک!!!

بو سؤزو ائشدجه گین،

دوزو انسان حس ائدیر،

آلنی آچیقلیق ـ غرور!

ایکی هجا بوسؤزده،

بیر عالم معنا دویور!:

ظلمه قارشی ساواش،

تجاوزله مبارزه،

عدالته دوغرو تلاش!

برک آیاقدا مردانه لیک

تسلیم ایله بیگانه لیک!

بو آد دوزو آزادلیغین سیمگه سی دیر،

دایانیشین علامتی!!

اؤزلوگونده عکس ائتدیریر، بو آد البت،

انسانلارین،

تاریخ بویی ایسته دیگی عدالتی!!

نه تهر کی بابک آدین ائشیدجه گین

مردانه لیک یادا دوشور،

افشین آدی چکیلنده،

اؤز ائلینه یارامازلیک ـ بیگانه لیک یادا دوشور،

سهل سنباط

ـ او تاریخین اوز قره سی! ـ

خیانتی جانلاندیریر گؤز اؤنونده

نامرد کیمی، نامردیانا!

هم گئچمیش ده هم بوگونده!

 

          ***

 

اون اوچ عصردن سونرا،

هله سنین شجاعتله،

دؤیوشدوگون بذ قالاسی،

بیزیم خلقین کیملیگینین،

داش جلیدلی سیجیللی سیدیر!

سنین قالان،

دایانیشین دویونله نمیش یوموروغو،

یاد ائللرین تجاوزکار صفتینه،

تاریخیمین شاق سیللی سیدیر!

 

          ***

 

بابک، بابک!!!

آدین سنین کؤنوللرین اولو نغمه سی!

سسین سنین خلقیمیزین اوجالان سسی!

گلیب گئدسه عصرلرده،

تاریخ چی لر قارا بهتان، بوش افترا،

قوشسالاردا آدینا!

سن یئنه اولوسان!!

اون اوچ عصردن سونرا،

خلقیمزین وارلیغینین،

سن بوگون ده،

ان دگرلی سمبولوسان!!

 

          ***

 

اؤز دوغوم گونونده اویان بیرآنلیق

گؤر خلقین گؤستریر نه قهرمانلیق!

یایین اولینده، قلعه دوزونده،

گول ـ چیچک یئرینه،

انساندیر بیتن!!

سندن قوت آلیر هله ائل ـ اوبا

سنین هنرینله یاشاییر وطن!!

 

                    تیر آیی 1386

نسخه قابل چاپ

   
   

   
 

ذربایجان" دا یازیلان مطلب لردن باشفا سایت لار ویایینلاردا فایدالانماق،
 یالنیز یازیچی، ترجمه چی و قایناق آ
دلارینی چکمکله آزادیر.