|
||||||
       |
||||||
|
|
احد واحدی
«باهارا دوغرو!!»
جیغیرلاری چیخیرام، داغلارا دوغرو! دره لردن قالخیرام دولای لاردان گئچیره م تپه لری آشیرام، داغلارا دوغرو!
داغلار یوکسک، داغلار سرت! جیغیرلار آیاقلاریمین آلتیندا اینانیلماز قدر یوموشاق! دولای لاردا، تپه لرده، و گئچدیگیم هر یئرده، اینانیلماز قدر یوموشاق!
داغلار یونولمامیش آلماس کیمی اؤنومده جیلوه له نیر؛ بعضا" ایشیلتی لی، بعضا" قاپ قارا! سحیرلی و جاذبه لی! سانکی طبیعتین توتارلی الی، خوش وقتینده، جان وئرمیشدیر اونلارا!
و من، سرحدسیز حیرتیمله، توکنمز قوتیمله، و سؤنمز اشتیاقیملا، جیغیرلاری چیخیرام، تپه لردن قالخیرام، داغلارا دوغرو!
داغلارین باشیندا آغ ـ آپپاق قار، یاشلی اولماسادا، یاشلی گؤرسه دیر اونلاری؛ اولسادا قیشین سونلاری، هله باهار گلمه میش؛ طبیعت، ـ یاز ایله یازار، قیش ایله پوزار ـ دئمیشلر! و ایندیسه شبهه سیز، پوزماق زمانی یوخ، یازماق وقتیدیر! *** سن ای سئویملی یاز!! ای دره لرین و داغلارین بیقرار یولچوسو! گؤتور قلمینی، من دئییم، سن یاز!:
"داها قیش آغ کورکونو سویونسون یاشیل کؤینه گینی گئیینسین داغ ـ دره؛ دؤشلرین قارلاری اریرکن، قار سویو سوزولسون هر یئره!
قوی ماوی و آچیق سماده، قوشلار چالسینلار قانات؛ زمینه ده قلمینله یاشات: "سو شیریلتی سینی، گول عطرینی، قوش سسینی!"
آغاجلاری تومورجوقلو چک، چؤلو یاشیل گئییملی؛ یاماجلاری آل ـ الوان و سولو چک، یئری بول و وئریملی!
ای حیات نفسلی گول ـ چیچگلی یاز! قوی سن ایله بیزده، قیشین رخوتیندن اوزاق، دیرچه لک بیر آز! گؤتور قلمینی افقدن ـ افقه، آرزیلاریمیزی یاز، ایسته کلریمیزی یاز! قیش 1386 |
|||||
|
"آذربایجان"
دا
یازیلان مطلب لردن
باشفا سایت لار ویایینلاردا
فایدالانماق، |
||||||